Russit naalakkersuisui: Nunat killiit gassip aqqutaanik siunissami qaartitseqqissanngillat
Nunat killiit gassip aqqutaanik siunissami qaartitseqqissanngillat.
Ruslandip nunanut allanut tunngasunut ministeria, Sergej Lavrov, gassit aqqutaasa Ruslandimit pigineqartut Bornholmip avataani Sverigellu kujasissortaata avataani siorna septembarimi qaartinneqartunut tunngatillugu taama oqamisaarpoq.
Nunat killiit nukissiuuteqarnikkut suleqatigineqarnerat Ruslandimi naalakkersuisunit tatigineqarunnaartoq, Sergej Lavrov Indiamut tikeraarnermini ilanngullugu oqarpoq.
Gassimut aqqutit Nord Stream 1 aamma Nord Stream 2 kikkunnit qaartinneqarsimanersut, Danmarkimit Europallu sinneranit nassuiarneqarsinnaasimanngilaq. Russilli qaartitsisuusimanissaat, nunat killiit oqaatigaat.
Immap naqqani qaartitsinerit nunanit killernit piliaasut, Ruslandip siusinnerusukkut oqaatigereerpaa. Qaartitsisoqarnerata nunanit tamalaanit misissuivigineqarnissaa Moskvami naalakkersuisut noqqaassutiginikuuaat.
Ruslandip qaartitsisuusimanissaanut takussutissanik maannamut nassaartoqarsimanngitsoq, misissuisut Tysklandimeersut qaammatip siuliani oqaatigaat.