Ruslandip Præsidentia mianersoqqusivoq
![](/sites/default/files/styles/image_934x467/public/2024-07/20240728-131945-L-1920x1280we.jpg?itok=kcPEDzRu)
Ruslandip præsidentia mianersoqqusivoq.
Amerikarmiut qaartartunik igeriuttakkanik Tysklandimi ikkussuiniarunik, assingusunik ikkussuiniarluni Ruslandip præsidentia, Vladimir Putin oqarpoq.
Ikkussukkatillu kitaanut eqquisinnaanera mianersoqqusivoq.
USA Natomiinnertik aqqutigalugu, Europalu saassutsinnissamut illersorsinnaatikkumallugu 2026-mi Tysklandimi qaartartut igeriuttakkat gps-llit aamma qaartartut igeriuttakkat sukkasuulianik ikkussuisoqarnissaa pilersaarutigaat.
- USAp pilersaarutit eqquutissagunigit, imatut paasissavarput siuliani isumaqatigiissutigut tamaasa atuukkunnaassasut, sakkut qanittuinnarmut igeriunneqarsinnaasut atorunnaariaannaavagut. Sakkutuut imarsiortut ingerlaaqatigiittoqarnerani Sainkt Petersborg-mi Putin oqalugiarami taama oqarpoq.
- Timmisartukkut qaartartut igeriuttakkat atomimik sakkoqarsinnaasunik peqalertussaavugut, taakkulu minutsit qulit iluani apuuttartussaapput, Putin oqarpoq.
USA Danmarkimut Filippinimullu qaartartunik igeriuttakkanik tunniussinera pissutsinik pissanganartunik pilersitsisoq, taanna oqarpoq.
Washingtonimi qaammat una Natop ataatsimeersuarnerani, USA Nato aqqutigalugu aningaasatigut sakkutigullu ikiuinissamut pilersaarutit saqqummiunneqarnikuupput.