Ruslandimi kuultisiorfiit ilaanni qaarusummi nakkaattoqarmat sulisut 13-it ingerlariaqqissinnaajunnaartut
Ruslandimi naalagaaffiup nutaarsiassaqartitsivia Ria Novosti, Amurimi annaassiniartartut paasissutissaataat aallaavigalugit sisamanngornermi taama allaaserisaqarpoq.
Qaarusuup isaariaata nalaa marsip ulluisa 18-ianni nakkaammat isaariaa asserneqarpoq sulisullu ingerlariaqqissinnaajunnaarlutik.
Qaarusuup iluani nakkaattoqaqqissinnaanera aarleqqutigineqarmat annaassiniarneq siusinnerusukkut unitsinneqarpoq. Nutaarsiassaqartitsivik Tass taama allaaserisaqarpoq.
Qaarusummi qanoq isilluni qarsutsineqarsinnaasimanersoq annaassiniartartut misissuleruttorpaat, qarsutsinerlu aamma qanoq annertutiginersoq misissorlugu.
Ruslandip ilaani Amurimi oqartussat taama nalunaaruteqarput.
- Annaassiniarneq nanginneqarsinnaanersoq misissuinerit takutikkumaarpaat, taamaalippat aalajangiisinnaaniassagatta, Ruslandimi oqartussat oqaatigaat.
Annaassiniartartut qillerinermi saniatigut ujararujussuarnik piiaapput, qaarusummiillu imermik milluaallutik.
Taassuma saniatigut iigaq cementilersorpaat nakkaaqqeratarsinnaanera aarleqqutigineqarmat.
/ritzau/Reuters