Rusland Finlandimut killeqarfimmi nalaanut sakkutuuliiniartoq

Finland nunat killiit illersoqatigiiffiannut NATO-mut ilaasortanngoreersorlu Rusland Finlandimut killeqarfimmi nalaanut sakkutuuliiniarpoq, sakkussianillu inissiiniarluni. Ruslandip præsidentia Vladimir Putin taama oqarpoq.

Putin Ruslandimi naalagaaffiup nutaarsiassaqartitsivianit RIA-mit, naalagaaffiullu tv-qarfianit Rossija-1-imit apersorneqarluni taama oqarpoq.

Sverigep Finlandillu NATO-mut ilaasortanngornerat aamma isumaqanngitsoq, Ruslandip præsidentiata ilanngullugu oqaatigaa.

- Finlandip Sverigellu taamaaliornissaat isumaqanngilluinnarpoq, nammineq soqutigisatik isumannaarniaannarlugit taamaaliorsimappata isumaqanngilaq, Putin oqarpoq nangillunilu:

- Finlandimut killeqarfiup nalaani sakkutuuliinikuunngikkaluarpugut, maannali sakkutuuliisariaqarluta. Sakkussianik tassani inissiinikuunngikkaluarpugut, maannali taamaaliortariaqalerluta, taanna oqarpoq.

Finland nunat killiit illersoqatigiiffiannut NATO-mut siorna apriilip ulluisa sisamaanni ilaasortanngorpoq, Sverigelu NATO-mut sapaatit akunnerata siuliani sisamanngornermi ilaasortanngorluni.

Rusland Ukrainemik 2022-mi februaarimi saassussereersorlu nunat marluk taakku NATO-mut ilaasortanngornissartik kissaatigilerpaat.

Finlandip Ruslandillu akornanni killeqarfik 1340 kilometeritut isorartussuseqarpoq.