Rusland aalisarneq pillugu nutaamik isumaqatigiissuteqarfigineqarpoq
Isumaqatigiissut atorfilittatigoortumik isumaqatigiissutaasoq Moskvami ataasinngornermi marlunngornermilu inaarlugu isumaqatigiinniutigineqarpoq. Isumaqatigiissuteqarnikkut kalaallit aalisartui siornamut naleqqiullugu saarullinnik pisassaat 600 tonsinik amerlineqarput. Taarsiullugu kullerinik pisassiissutit siorna pisarineqartunut naleqqiullugit pingasorarterutaasa missaannik ikilineqarput. Kullerit ikiliartorpiloornerannik tamanna pissuteqarpoq.
Russit aalisartui siunissami Tunumi Kitaanilu qaleralinniarsinnaalissapput, aammalu suluppaakkanik ikerinnarsiortunik pisaqarsinnaalissallutik. Suluppaakkanik pisassiissutit appariartulaarput, qaleralinnillu pisassiissutit ukiuni kingullerni russit aalisartuinut pisassiissutigineqartunut assigullutik.
Russinut isumaqatigiissutip Ruslandimut Kalaallit Nunaannullu naleqartupilussuartut naalakkersuisoqarfimmit inuussutissarsiortunillu nalilerneqarpoq. Pisassiissutinik paarlaasseqatigiinneq ajorisassaanngitsutut oqaatigineqarpoq. Aalisarnermut naalakkersuisup Ane Hansenip isumaqatigiissut inaarutaasumik akuerisassanngorlugu naalakkersuisunut kingusinnerusukkut saqqummiutissavaa.
