Birna pillugu suliaq: Toqutsisimasutut unnerluutiginninneq politiit aalajangiusimavaat

Islandimi tusagassiorfik Visir naapertorlugu, Birna Brjánsdóttirip januaarip 14-iani periarfeerunneqarnerani susoqarsimaneranut suliap eqqartuussivimmi ippassaq suliarineqarnerani paasissutissat erseqqinnerusut saqqummiunneqarput.

Visir naapertorlugu, angutip pineqartup biilimik attartukkaminik - nivissanik marluugunartunik ilaasoqarluni - unnuakkut angalasimanini nassuerutigaa.

Kilisaammi Polar Nanumi inuttaqatini kilisaatip eqqaanut niusinnarlugu umiarsualiviup ilaanut allamut ingerlasimavoq.

Videokkut nakkutilliissutinik immiussat naapertorlugit unnerluutigineqartoq tamatuma kingorna minutsit 50-it missaanni biilip issiviani tunorlermiippoq.

Politiillu angutip tassaniinnermini Birnamik ajoqusiisimanerarpaat.

Nakorsat toqusunik misissuisartut nalunaarusiaat naapertorlugu nivissap timaa annertuumik ajoquserneqarsimavoq aanaarujussuarsimalluni.

AAMMA ATUARUK Unnerluutigineqartup nassuiaatini eqqartuussivimmi allanngortikkaa

Pasineqarluni unnerluutigineqartup oqaatigaa nivissat nermallaap eqqaanut nalunaaqutaq arfineq-marluk missaani niusimallugit, tamatumalu kingorna timigissartarfiliarsimanerarpoq biilimilu sinissimanerarluni.

Timigissartarfiup videokkut nakkutilliissutaanik immiussani biili takuneqarsinnaanngitsoq Islandimi politiit aalajangiusimavaat. Politiillu isumaqarput angutip piffissap taamaalinerani Birna ajoqusersimaqisoq sissamukaassinnarlugu imaanut igissimassagaa.

Ullaap tungaanilu kingusinnerusukkut niuertarfiliarpoq eqqiaanermut atortunik pisiniarluni, videokkullu nakkutilliissutinik immiussani takuneqarsinnaavoq ullup-qeqqalernerani biili eqqiaraa.

AAMMA ATUARUK Kalaaleq toqutsisimasutut hashimillu eqqusseriarsimasutut pasineqarpoq

Teknikkikkullu misissuinermi paasineqarpoq pingaartumik biilip issiavia tunorleq aattaqartoq, aallu Birna Brjánsdóttirimeersuusoq. Unnerluutigineqartulli issiaviup tunorliup aattaqarsimanera ilumuunnginnerarpaa.

Politiit angummut 30-nik ukiulimmut pasilliutit arlallit eqqartuussinermi ippassaq unnukkut ingerlanneqartumi saqqummiuppaat, ilaatigut Birnap biilimik ingerlatitsisinnaanermut allagartaata kilisaammi nassaarineqarsimanera.

Eqqartuussineq tulleq maajip qulingiluaani pissasoq, Visir allappoq.