Rubinisiorfik iluatsitsiffiulersinnaalersoq
Maannamulli taamaallaat rubinisiorfiup ammarneqarnissaa iluatsinneqarsimavoq, taannalu aatsitassarsiorusuttunik allanik ammaasseriaannaavoq.
- Maannakkut taasinnaasatsinni ukiut tallimat ingerlanerini aatsitassarsiorfiit pingasut tallimalluunniit ukiut tallimat iluanni ammarneqarsinnaapput, eqqoriarneqarporlu sinerissap avataani ataasiarluni marloriarluniluunniit qilleraluni uuliasiortoqarsinnaasoq, Naalakkersuisut aatsitassanut iliuusissaanni 2014-imeersumi taama allassimasoqarpoq.
Iliuusissalli piviusunngortinnissaa ajornakusoorsimavoq. Uuliasiorneq unittoorsimavoq, aatsitassarsiorfinnilu pisortatigoortumik taamaallaat rubinisiorfik Aappaluttoq ammarneqarsimalluni.
- Piffissartornarsimavoq. Aaqqissuussinerup iluaniit politikerinillu tikilluaqquneqaqaagut. Suliassaat suliarineqapallattarput, tamannalu nuannaarutigeqaarput, rubinisiorfimmi aningaasaliinerpaasimasuni LSN Groupimi pisortaaneq Frode Nielsen taama oqarpoq.
Xploration Services Greenlandimi siulersuisuni siulittaasoq aallartitsisuusorlu Martin Shalmi neriuppoq tamanna aatsitassarsioqatigiiffinnut allanut tuniluukkumaartoq.
Aappaluttoq iluatsilluassappat aningaasaliisimasullu aningaaserivimmiititaqalerluassappata Kalaallit Nunaanni aningaasaleerusuttunut allanut tamanna neqitaalluarsinnaalissasoq, Shalmi 2004-mili aatsitassarsiornermik sammisaqarsimasoq taama oqarpoq.
Shalmi naapertorlugu aatsitassarsiortut tamaani 2011-mi suliaqakuttooriarlutik maanna ingerlanerluttupilussuangorsimasut pissutigalugu uuliap aatsitassallu nalingi appariartupiloorsimammata.
- Naqqinereeratta maanna qummut ingerlaqqilerpugut. Aningaasaleerusuttullu pitsaasunik atugassaqartikkutsigit ukiut arlaqanngittut qaangiuppata aningaasat takkussuutilissasut taanna oqarpoq.
Martin Shalmi isumaqarpoq Kalaallit Nunaat Aatsitassarsioqatigiiffinnut pilerinarsassagutsigu aatsitassarsiortunut royaltiinik taaneqartartut peerneqartariaqarput.