Royal Greenlandip tunisassioriaasia kinamiup pisisartup ajasoorutigigaa

Alimex Seafood A/S-imi pisortaanerup Kun Songip Royal Greenlandip Sisimiuni, Sarfannguani, Maniitsumi Nuummilu saarullinnik ilivitsunik qerinasuartitanik tunisassioriaasianik malinnaanissani kissaatigisimavaa. Royal Greenlandip tunisassiai tunisassiaatalu pitsaassusaat Kun Songimit naammagisimaarneqarlutillu ajasoorutigineqarput. Suliffeqarfissuaq nittartakkamini taama allaaserisaqarpoq.

- Pisisartorput Kinameersoq tikeraarpoq tunisassioriaaserput takornarniarlugu. Tunisassiassat tunisassiarisartakkatta qaffasissumik pitsaassuseqarnerat pillugu naammagisimaarinnillunilu tupaallappoq. Ingammik Sarfannguani tunisassiassat qaffasissumik pitsaassusillit ajasoorutigai, Royal Greenlandimi tunisassiassalerinermi ingerlatsisoq Niels Wann Jensen oqarpoq.

Kinami pisisartuni annerup tulliani

Suliffeqarfik nunarsuarmi tamarmi tunisassiornermik tuniniaanermillu aallutaqartoq, Alimex Seafood A/S, aalisakkanik qerinasuartillugit tunisassianik Europami igaffissuaqarfinnut niuertarfeqarfinnullu pilersuisuuvoq, Royal Greenlandillu Kinami pisisartuini pisinerpaasartut tulleralugu.

- Pisisartutta tunisassiorfiutitsinni saarullinnik ilivitsunik qerinasuartitsilluta tunisassiortarnigut malinnaavigai, Maniitsumili saarullinnik "Nutaaq"-nik tunisassiornerput aamma malinnaavigaa. Pisisartutta saarullinnik tunisassiat "Nutaaq"-nik taaneqartartut . Maniitsumilu pitsaalluinnartumik ajasoornartumillu tunisassioriaaseqarluni tunisassiarineqartartut tupinnartutut nalilermagit nalunanngitsumik taakkununnga aamma soqutiginnippoq. Taamaattumik "Nutaaq"-nik aamma pisisartunngornissaa neriuutigaarput, Niels Wann oqarpoq RG-ip nittartagaanut taama oqarpoq.

Saarulliit 15.042 tonsit Royal Greenlandip sineriammi tunisassiorfiinut 2014-15-imi tunineqarput. 2013-14-imi tunineqartunut sanilliullugit 30 procentit missaani annertunerupput, suliffeqarfissuaq taama ilisimatitsivoq.