Ritzau

Hamasip sallunaveeqqutitut tigummiaasa toqungasut timaat 28-iusut akornanni 23-t Israelimut tunniunneqartut

Sallunaveeqqutitut tigummiat 48-t iperagaanissaat, Hamasip Israelillu sakkuaakkunnaarallarnissamik oktobarimi isumaqatigiissutaanni isumaqatigiissutaavoq. Inuit suli uumasut 20-t maannamut iperagaapput Israelimullu tunniunneqarlutik. Sallunaveeqqutitut tigummiat ilaata toqungasup timaa tunniunneqartoq 2023-mi oktobarip ulluisa arfineq-aappaanni toqutaavoq.

Allattoq Mads Lynge

novembarip 08-at 2025 13:15

Sallunaveeqqutitut tigummiat ilaat toqungasoq Israelimut tallimanngornermi tunniunneqarpoq, kinaassuserneqarlunilu.

Israelimi illersornissaqarfik arfininngornermi taama oqarpoq. Nutaarsiassaqartitsivik AFP taama allappoq.

Hamasip Israelillu sakkuaakkunnaarallarnissamik oktobarimi isumaqatigiissusiornerat aallaavigalugu sallunaveeqqutitut tigummiap timaa tunniunneqarpoq.

Sallunaveeqqutitut tigummiat 48-t iperagaanissaat isumaqatigiissutaavoq. Suli uumasut 20-t oktobarimi iperagaapput.

Aamma atuarukUSA-p sakkutuut 200-t sakkuaakkunnaarnermik malinnittoqarnissaa pillugu Gazamukartikkai

Sallunaveeqqutitut tigummiat toqutaasimasut 28-t akornanni 23-t tunniunneqareerput. Tassaapput Israelimiut 20-t, ataaseq Thailandimeersoq, ataaseq Nepalimeersoq, ataaserlu Tanzaniameersoq.

Palæstinamiut parnaarussat 2000-t Israelip akerlianik iperagaatissimavai.

Sallunaveqqutitut tigummiat ilaat toqungasoq tunniunneqartoq kinaassusersineqarpoq, tassaavorlu angut 61-inik ukiulik Israelimiunit Argentinamiuniillu kingoqqisoq. Taanna Hamasip Israelimik 2023-mi oktobarip ulluisa arfineq-aappaanni saassussinerani toqutaavoq. Taassuma timaa ulloq taanna Gazaliaanneqarpoq.

Sallunaveeqqutitut tigummiat toqutaasimasut tallimat timaat suli tunniunneqanngitsut

Sallunaveeqqutitut tigummiat toqutaasimasut tallimat timaat akornanni sisamat 2023-mi oktobarip ulluisa arfineq-aappaanni aallarunneqarput - tassaappullu Israelimeersut pingasut Thailandimiorlu ataaseq. Gazami 2014-imi sorsuttoqarnerani sakkutuup toqutaasup timaa aamma tunniunneqartussaavoq.

Toqungasut timaasa Israelimut tunniunneqarnerat Hamasimit sivitsorsaarneqartoq Israelip pasiliutiginikuuaa.

Toqungasut timaat illut Gazami sorsuttoqarnerani aserorneqarsimasut ilaatigut ataanniimmata toqungasut timaat angujuminaassinnaasut, Palæstinamiut akerlianik oqaatigaat.

Aamma atuarukHamasip sallunaveeqqutitut tigusat sinneruttut Røde Korsimut tunniukkai

Inuit katillugit 251-it sallunaveeqqutitut tiguneqarlutik 2023-mi oktobarip ullusia arfineq-aappaanni Gazaliaanneqarput. Inuit 1200-t missaat Hamasip saassussinerani taamanikkut toqutaapput, amerlanerit sakkutuujunngitsut nutaarsiassaqartitsiviup AFP allaaseraa.

Inuit 68.000-t missaat Gazami sorsuttoqarnerani toqutaasimasut, Gazami peqqinnissaqarfiup, Hamasimit aqunneqartup, oqaatigaa. Kisitsit uppernarsarneqarnikuunngilaq, Naalagaaffiilli Peqatigiit kisitsit pineqartoq tutusuiginartutut nalilerpaat.

/ritzau/AFP

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.