Filippinerini innuttaasut millionit anoraasuarsuannginnerani qimagussortinneqartut

Filippinerini nunap kangisinnerusortaani avannarpasinnerusortaanilu innuttaasut millioninit ikinnerunngitsut qimagussortinneqarput.

Tamanna pivoq, anorersuup Fung-wongip sakkortuninngornerani anoraasuarsuartut maanna isigineqalermat, nutaarsiassaqartitsivik Reuters allappoq.

Nunap ilarujussuani anorersuarnissaanik aarlerisaaruteqartoqarpoq. Sumiiffiit arlallit anoraasuarsuit sakkortussusaat 5-imiinnissaanik aallerisaaruteqartoqarpoq, taanna Filippinerini aarlerisaarutini sakkortunerpaavoq. Tamanna kujataata kangisissuani qeqertami Luzonip nunap immikkoortuini Catanduanesimi, Camarines Nortemi aamma Camarines Surimi atuutissaaq.

Illoqarfiup pingaarnersaani Metro Manilalami taassanilu immikkoortut eqqaaniittut anoraasuarsuit sakkortussusaat 3-miinnissaanik aallerisaaruteqartoqarpoq.

Nunap immikkoortuanut Auroramut Luzon qiterpasissuaniittumut anori ataavartumik sekundimut 51,4 meteritut sakkortutigaluni, sekundimullu 64 meteritut sakkortutigaluni anoraasuartarnissaa naatsorsuutigineqarpoq.

Tamanna sumiiffimmi nalunaaqutaa malillugu sapaammi unnukkut pissaaq.

Reuters naapertorlugu, Filippinerit kippasissuaniittumi qeqertat ilaanni Visayami innaallagiaqannginnermik ajornartorsiulereerput.

Anorersuaq alla aamma

Nunap silaannakkut angallannermut oqartussaasui sakkutuujunngitsut naapertorlugit, nunap iluani aamma nunat tamat akornanni timmisartuussinissat 300-nit ikinnerunngitsut taamaatinneqarput.

AFP naapertorlugu, Luzonimiittumi Sorsoganimi innuttaasut arlallit oqaluffimmut oqquiffissarsiorput.

- Maaniippunga, illuma eqqaani malerujussuaqarnera pissutigalugu. Sinerissap qanittuani najugaqarpunga anorilu maanna sakkortoorujussuuvoq, innuttaasoq Maxine Dugan nutaarsiassaqartitsivimmut oqarpoq.

Nuna anoraasuarsuarmik Kalmaegimik sapaatip-akunnerata aallartisimalernerani aamma aqqusaarpaa, ajunaarnersuaqartillugu paasissutissanik katersuiffik EM-DAT naapertorlugu, taanna ukioq manna ajunaartoqarnerpaaffiuvoq.

Nunap naalakkersuisuiniit kisitsisit kingulliit naapertorlugit, ikinnerpaamik inuit 204-t toqutaapput 109-llu maqaasineqarlutik.

Aammattaaq tallimanngornermi Vietnam aqqusaarmagu ikinnerpaamik inuit tallimat toqupput, AFP allappoq.

/ritzau/