Vietnamimi inuit 25-t anorersuarujussuarnerani ajunaarsimasut

Vietnamimi sakkutuut hunnorujukkuutaat nunami tassani sumiiffinni assigiinngitsuni siallerujussuarnerata kingunerisaanik nunap sisoornerani annassimasinnaasunik ujaasipput.

Inuit 13-init ikinnerunngitsut anorersuarujussuup Molavep anngunnerata kingunerisaanik ajunaarnersuaqarnerani ajunaarsimasut, Vietnamimi naalakkersuisut sisamanngornermi ilisimatitsipput.

Aalisartut aqqaneq-marluk ajunaarsimasut aamma nassaarineqarput. Taakkua angallataat umiarsualivimmut isumannaatsumut marlunngornermi taliffissarsioraluarnerminni kivisimavoq. Angallammi tassani inuttat allat 14-it ujaarineqarput.

Vietnamimi ukiut qulikkuutaat kingulliit ingerlanerini aatsaat taama sakkortutigisumik anorersuarujussuartoq, Vietnamimi oqartussat oqarput. Annaassiniarneq silarlorujussuarnera peqqutigalugu kipiluttunarpoq.

- Anorersuarujussuup sumut saqikkiartussanersoq qanorlu siallertigissanersoq naatsorsorsinnaavarput, nunali qaqugu sisooratarsinnaanersoq siulittuutigisinnaanngilarput, Vietnamip ministeriuneranut tullersorti Trinh Dinh Dung oqarpoq.

AAMMA ATUARUK Vietnamimi nuna sisummat sakkutuut 14-it ajunaarput

Inuit millionilikkuutaat oktobarip aallartinneranili anorersuarujussuaqattaarneranit, siallerujussuarneranit qarsutsinernillu eqqugaapput.

Innaallagissamik inunnut millionilikkuutaanut pilersuineq kingullermik anorersuarujussuarnerani ajalusoorlunilu illut 56.000-t missaat aseruatiterput.

Kiattup anorersuarujussua Molave Vietnamimut marlunngornermi anngutereernerani anorikilliartorpoq, nunamullu anginngitsumut tassa Laosimut sisamanngorpat anngunneqassangatinneqarluni.