Royal Greenlandip qarasaasiatigut saassunneqarnera suli kingunerluuteqartoq
Royal Greenland sapatit-akunnerata siuliani sapaatiumalli qarasaasiatigut saassunneqarpoq.
Suliffeqarfiup attaveqaqatigiinnermut atortuinut, akissarsialereriaasianut atortuinillu allanut aamma kinguneqarnerlutsitsivoq.
Suliffeqarfiup qarasaasiatigut saassunneqarnera qaangerneqariartuaartoq, ajornartorsiutilli aaqqiivigineqarnissaannut suli piffissaqartariaqarnertik, Royal Greenlandip paasissutissiinermut pisortaata Masaana Egedep oqaatigaa:
- Suli saassunneqarpugut. Saassussinerlu anigorniarlugu atortut assigiinngitsut atorunnaarallarpavut, atortullu ataasiakkaarlugit ikititerlugit atoqqikkiartuaalerlutigit. Atortut pisariaqartitavut ataasiakkaarlugit ammartiterpavut, Masaana Egede oqarpoq.
Qarasaasiatigut saassussineq qaqugu aniguinneqarsinnaanersoq taassuma oqaatigisinnaanngikkallarpaa, sivisusinnaasorli oqaatigaa.
Aningaasarsiassat eqqorneqarput
Royal Greenlandip qarasaasiatigut saassunneqarnerata kingunerisaanik assersuutigalugu fabrikkimi sulisut akissarsiaannut, aalisartullu aningaasarsiassaannut sunniuteqarpoq. Tamanna suli aaqqiivigineqanngitsoq Royal Greenlandimit oqaatigineqarpoq:
- Una fabrikkimi sulisunut aalisartunullu ilungersunartuusimammat paasilluinnarparput. Tulliani akissarsisoqarnissaanut atatillugu eqqortumik akissarsisoqarnissaa tamaviaarluta sulissutigivarput, Masaana Egede oqarpoq, nangillunilu:
- Kisianni qarasaasiatigut saassunneqarneq ilungersunartuummat datat assigiinngitsut suli amigaatigaavut, eqqortumilli tulliani akissarsisoqarnissaa pingaarnerpaatut isigalugu maanna sulissutigaarput, Royal Greenlandip paasissutissiinermut pisortaa Masaana Egede oqarpoq.
AAMMA ATUARUK Royal Greenlandip saassunneqarnera sulisut aningaasiviinut tuppoq
Royal Greenland qarasaasiatigut saassunneqarmat suliffeqarfik tamakkerlugu eqqorneqarpoq, suliffeqarfiup Kalaallit Nunaanni sulinerata saniatigut Danmarkimi, USA-mi, Japanimi Kinamilu sulinera aamma eqqorneqarlutik.
Naalgaaffeqatigiinnermi kilitsissiaqarsinnaasoq
Sillimaniarnermut politikkikkut pissutsit najummatsisimanarnerulermata nunarput, Savalimmiut Danmarkilu russinit kilitsissiatut suliaqarnermik eqqugaaratarsinnaapput. Soorlu Issittumi nunat allat aamma taama nalaataqarsinnaasut.
- Rusland Danmarkip issittumi inissisimanera pissutigalugu paasissutissarsiniarnissaq pingaartissagaa ilimanarluinnarpoq. Minnerunngitsumik qarasaasiaq atorlugu paasiniaanermi, isertortumik paasiniaasartut allapput.
AAMMA ATUARUK Aarlerinaatilinnik naliliineq: Russit Pituffimmi sakkussiorneq aarlerinartutut isigissavaat