Royal Greenlandip saassunneqarnera sulisut aningaasiviinut tuppoq
Royal Greenlandip qarasaasiatigut atortui ataasinngormalli peqquserluffigineqarnermikkut ajutoorput.
Suliffeqarfiulli itinerusumik paasissutissiinissani tunuarsimaarfigaa, oqarasuaatikkulli oqaatigalugu akiliiniarnerit annermik eqqugaanerpaasut.
Maannali taamatut peqquserluttoqarnera sulisunut tuppoq, taakkumi pisarnermit minnerungaatsiartumik aningaasarsitinneqartut, sulisut sinniisaasa marluusut KNR-mut oqaluttuaraat.
- Nalinginnaasumik agguaqatigiissillugu ullut 14-inut 6000 koruunit sinnerlugit ilaanni akissarsisoqartarpoq, tusakkakka malillugit ilaat taamaallaat 3000 koruunersipput, tamanna annikippoq ilami affaaluunniit immaqa inorlugit tunniunneqarput, Anine Zeeb Ilulissani Royal Greenlandimi sulisunut sinniisaasoq oqarpoq.
Nangipporlu:
- Tusakkakka malillugit sulisut ataasiakkaat pakatsipput, juullimi qanillivoq, tullianimi akissarsiffik tassaavoq aatsaat ukiutoqalerpat, aap sulisut ilaannit iluaagineqarpoq immaqa amerlanerpaat iluaagaat, Anine Zeeb oqarpoq.
Sulisut sinniisaat: Naluarput qaqugu tungaanut ingerlassasoq
Anine Zeebip ernummatigaa, nalinginnaasumik akissarseqqinnissap tungaanut sivitsoruttooratarsinnaanera.
- Inimik akilersugaqartarpugut, nalunngilarput juulli akisusaqisoq naluarpullu qarasaasiatigut ajutoornerup qaqugu aaqqikkumaarnissaa, pinngitsoorani decembarip naanerani jannuaarillu aallartinnerani inimut akiliisussat kalluarneqassapput. Isumaga taamaappoq naluara allat qanoq isumaqarnersut, Anine Zeeb oqarpoq.
Ilulissanili Royal Greenland kisimi eqqugaanngilaq, aammali Upernavimmi Royal Greenlandimi sulisut eqqugaasut, Upernavimmi Royal Greenlandimi asaasoq aammalu sulisunut sinniisuusoq Magdaline Svendsen Berthelsen oqarpoq.
AAMMA ATUARUK Royal Greenlandip saassunneqarnini ullut pingajussaanni ilungersuutigaa
Taassumali ataatsimut isigalugu suliffimmi naammagisimaarinninneq malugaa.
- Siumoortinneqarpugut, qarasaasiatigut ajutoortoqarnera peqqutigalugu, kingusinnerusukkulli aaqqinneqarnissaat neriorsuutigaat, taamatullu aaqqiisoqarnera naammagisimaarnarpoq, Magdaline Svendsen Berthelsen oqarpoq,
- kisianni ippassaq naalaruluppugut akissarsitinneqassanerluta imaluunniit akissarsitinneqassannginnersugut, ullaaq mannali aatsaat paasivarput aningaasarsitinneqarsimalluta, Magdaline Svendsen Berthelsen oqarpoq.
Royal Greenland: Pisoq ilungersunarpoq
Royal Greenlandimi paasissutissiinermi pisortaasoq Masaana Egede ullaap tungaani tamanna pillugu oqaloqatigaarput, taassuma uppernarsarpaa sulisut aningaasarsiakinnerutinneqarmata aammalu sulisut toqqissisimannginnerat paasisinnaanerarlugu.
- Maannakkuugallartoq sulisut siumoortippagut qarasaasiagulli aaqqeqqeriarpata akissarsiaat iluarseqqikkumaarput, Masaana Egede oqarpoq.
Taassumattaaq erseqqissaatigivaa qarasaasiat aaqqeqqeriarpata sulisut akissarsiaat aamma iluarsineqarumaartut.
Masaana Egede taama uppernarsaasinnaappat taava imaassimassaaq siumoorneq utaqqiisaarummik aaqqiinerusimassasoq.
Tamakkiisumilli aningaasarsititsineq aatsaat pisinnaavoq qarasaasiat ajutoorneri aaqqinneqarpata.
- Qaqugu ilimagaasiuk sulisut iluamik akissarsitinneqaqqinnissaat?
- Qarasaasiatigut ingerlatsinerput aaqqippat aaqqissapput maanna siumoortitsigallarpugut, oqarpoq.
- Qaqugu aaqqiivigineqassava taava?
- Taanna akisinnaanngikkallarpara, Masaana Egede oqarpoq.
Nangipporlu:
- Sulisut ilungersunartorsiornerat paasilluarsinnaavarput, erseqqissumilli oqarsinnaavugut qarasaasiagut aaqqeqqeriarpata aningaasarsiaat aaqqeqqikkumaartut, Masaana Egede oqarpoq.
