Royal Greenlandip saassunneqarnini ullut pingajussaanni ilungersuutigaa
Ullut pingajussaanni.
Royal Greenlandip qarasaasiatigut saassunneqarnera tassa taamak sivitsortigaaq.
Suliffeqarfilli ajornartorsiummik iluarsiiniarluni suli ilungersorpoq.
Masaana Egede suliffeqarfissuarmi attaveqatigiinnermut ingerlatsisoq KNR-mut ullumi oqarpoq.
- Suli killiffipput taamaaginnarpoq, suli qarasaasiatigut peqquserluffigineqarnerput iluarsinngilarput tamannalu ilungersunarpoq, aaqqiiniarsarivugulli, tassa pisisartutta, tuniniaasartutta aammalu tunisassiorfitta eqqorneqarnerlunnginnissaat qularnaarniarlugu tamaviaarpugut, Masaana Egede oqarpoq.
AAMMA ATUARUK Royal Greenland qarasaasiatigut peqquserluffigineqartoq
Taassuma qarasaasiatigut saassunneqarneq pillugu itinerusumik oqaaseqarusunngilaq, attaveqaqatigiinnermulli tunngasut aammalu akiliinermut tunngasut matumani pineqartut erseqqissaatigai:
- Ilungersunartua uaniinneruvoq, akiliiniartarnerput ilungersunarnerummat pappiaqqammi atorlugit akiliineq maanna ingerlasarpoq, neriuppugummi aalisartut tunisisartugut pisisartugullu eqqorneqassanngitsut, oqarpoq.
Sooruna taamak aaqqikkuminaatitsigaasiuk?
. - Qarasaasiatigut saassunneqarneq immini ilungersunartuunera aaqqikkuminaatsitsisuuvoq, akivoq.
Tassa imaappa erseqqinnerusumik akisinnaanngilatit?
- Aap, akisinnaanngilanga.
Sukumiisumik misissuisoqarpoq
Saassussineq qanoq annertutigiva? Nunatsinni allaffeqarfissi kisimi saassunneqarpa? imaluunniit nunani tamalaani allaffeqarfisi aamma saassunneqarpat?
- Suliffeqarfipput nunani tamalaani aamma ingerlatsiviuvoq, suliffeqarfippullu tamarmi saassunneqarpoq, taamaammat suliffeqarfiup qarasaasiai tamarmik maanna mississorneqarput.
Tassa imaappoq, nunatsinni allaffeqarfik nunaniluunniit tamalaani allaffeqarfisi ilanngullugit eqqorneqarnersut oqaatigisinnaanngilat?
- Oqaatigisinnaanngilara. Oqareernittuut nunani tamalaani suliffeqarfiugatta suliffeqarfitta IT-qarnera tamarmiusup piaartumik aaqqinneqarnissaa misissoqqissaarneqarpoq.
Sooruna erseqqinnerusumik oqartoqarsinnaanngittuaannartoq?
- Qarasaasialerisutta eqqissillutik sulinissaat pingaartuuvoq.
Pisisartussi eqqorneqannginnissaannut mianersornersi tamatumunnga tunngasuua?
- Tamanna oqaatigisinnaanngilara, Royal Greenlandip suliffeqarfissuarmi attaveqatigiinnermut ingerlatsisoq, Masaana Egede KNR-mut oqarpoq.
