Royal Greenland qarasaasiatigut peqquserluffigineqartoq

Royal Greenland qarasaasiatigut peqquserluffigineqarpoq.

Suliffeqarfiup attaveqaqatigiinnermi pisortaa, Masaana Egede KNR-imut oqarpoq.

- Peqquserluffiginninneq sapaatiummalli aallartissimavoq, tamaviaarlutalu aaqqinniarsarivarput, Masaana Egede oqarpoq.

Peqquserluffigineqarnerup kingunersisaanik Royal Greenlandimi attaveqaqatigiissinnaaneq akiliisinnaanerlu massakkuugallartumik ilungersuutigineqarput.

Tassa Royal Greenlandimut sianerniarneq mail-ikkullu nassiussiniarneq ajornakusoorpoq. Tamatuma saniatigut nittartagakkut akiliut, aalisartut Royal Greenlandillu atortagaat ajorallarpoq.

- Tamatuma pisiortorfigisatsinnut sunniuteqannginnissaa Royal Greenlandi aaqqiiniarsaraluni ilungersorpoq. Tunitsivigut nalinginnaasumik ingerlapput, tassanilu qangatut pappiaqqanut nalunaarsuilluta.

Royal Greenland sumit qanorlu qarasaasiakkut peqquserluffigineqarnersoq, Royal Greenlandip suli paasissutissiisinnaanngilaa.