Aarlerinaatilinnik naliliineq: Russit Pituffimmi sakkussiorneq aarlerinartutut isigissavaat

Ruslandip Kalaallit Nunaanni Savalimmiuniluunniit sakkutooqarnikkut annertusaanerit nutaat imminnut sammisutut isigisinnaavai. Illersornissaqarfiup isertortumik paasiniaasartui aarlerinaatilinnik naliliinerminni nutaami, ataasinngornermi unnukkut saqqummertumi taama naliliipput.

Naliliinermi Danmarkimut – naalagaaffeqatigiinnullu - aarlerinartut aarlerinartuusinnaasullu pingaarnerit pingaarnersiorneqarput. Isertortumik paasiniaasartut oqarnerat naapertorlugu russit nunatsinnut immikkut ittumik ukkatarinnipput:

- Amerikamiut Kalaallit Nunaanni suliaat Ruslandip ukkatarilluinnaqqissaarpai, USA-llu soqutigisai pakkersimaarniarlugit. Kalaallit Nunaanni Savalimmiuniluunniit sakkutooqarnikkut mutaanik atortulersornerit russiit imminnut akerliusutut isiginiarpaat, aalerinaatilinnik naliliinermi allassimavoq.

Sakkutoooqarnikkulli iliuutsit assigiinngitsut - aamma immaqa russit isaanniit - assigiinngissuseqarput.

Nutarterisoqaliivinngitsoq

Savalimmiuni raadari silaannarsuarmik nakkutilliissutaasussaq Ruslandip saamasaartumik isigisinnaavaa, amerikamiulli nunatsinni sakkutooqarnermi nutarsaanerat allaanerusumik isigissagunarlugu.

- Assersuutigalugu Putuffimmi sakkortusaasoqaraluarpat tamanna toqqaannartumik (Ruslandimut aaqq.) aalerinartutut isigineqassaaq, isertortumik paasiniaasartut allapput.

USA Pituffimmi sakkutooqarfimmi annertuumik nutarsaaqqajaalersut danskit aviisianni novembarimi atuarneqarsinnaavoq. allaaserisaq, Weekendavisenimi saqqummersinneqartoq Martin Breumip Issittumi ukkataqarnermik tusagassiortumik oqaloqatigisaanik, kinaassutsiminik isertuussisumit aallaaveqarpoq,

Danskilli nunanut allanut tunngasunut ministeriata, Socialdemokraatineersup, Jeppe Kofodip oqarnera naapertorlugu amerikamiunit paasissutissarsiani naapertorlugit nutarterisoqaliivinngilaq.

USA-lli nioqquteqarfiit misissorsimagai ministerip tusarsimavaa, tamanna Folketingimi Kalaallit Nunaannut tunngasunut atatsimiititaliamut allatigut akissuteqarluni paasissutissiissutigaa.

Timmisartut malersuutit rakettillit

Ruslandilli Issittumi politikkia assigiinngitsunik paasisassaavoq.

Russit Issittoq saqitsaaffiunngitsutut isumannaatsumillu aningaasaliiffiusinnaasutut oqaatisaraluarlugu sakkutooqarnikkut suliaminnik suli sakkortusaasut, isertortumik paasiniaasartut erseqqissaatigaat.

Taava aamma Issittumi sakkutooqarneq pineqartillugu russit siuttuupput.

- Ruslandimi sakkutuut atortuutiminnik alliliipput nappaatitereqqillutilluunniit, siuttuuneralli USA-p Issittumi piffissami tassani sakkutooqarnikkut salliutitsinnginnerannik aamma pissuteqartoq, aarlerinartunik naliliinermi allassimavoq.

Russit Issittumi sakkussiornerat nammineq soqutigisaminnik illersuiniarnerannik aallaaveqarpoq, aammali saassussisinnaanermut tunngassuteqarluni.

Ruslandip Issittumi sakkutooqarfiinit  – aarlerinaatilinnik naliliineq naapertorlugu – timmisartunik malersuutinik MiG-13-inik, raketteqarsinnaasunik piffissami qanittumi pissarsisinnaavoq, taakkualu Amerikamiut Atlantikup avannaani umiarsuaannut sorsuutinut timmisartunut mittarfiutigisunut aarlerinarsinnaapput.

- Ruslandip issittumi sakkutooqarfiani avannarpasinnerpaamit rakettit Pituffimmut minutsit 40-t iluanni eqquisinnaapput, isertortumik paasiniaasartut allapput.

Illuatungaani USA Ruslandip Issittumi sakkutooqarnikkut illersorsinnaaneranut akerlileerusuppoq.

- Amerikamiut russit USA-p nunallu killiit atortulersuutaannut siooralersitsisinnaanerat pinngitsoortikkusuppaa, nalunaarusiami allassimavoq.

Naalaaffeqatigiinnermi kilitsissiaqarsinnaasoq

Sillimaniarnermut politikkikkut pissutsit najummatsisimanarnerulermata nunarput, Savalimmiut Danmarkilu russinit kilitsissiatut suliaqarnermik eqqugaaratarsinnaapput. Soorlu Issittumi nunat allat aamma taama nalaataqarsinnaasut.

- Rusland Danmarkip issittumi inissisimanera pissutigalugu paasissutissarsiniarnissaq pingaartissagaa ilimanarluinnarpoq. Minnerunngitsumik qarasaasiaq atorlugu paasiniaanermi, isertortumik paasiniaasartut allapput.

Taamaassappat russit anngiortumik misissuinermut atortut assigiinngitsut atorsinnaavaat. Kilitsissiat najuuttut aamma qarasaasiatigut ingerlanneqartut atorneqarsinnaapput.