Royal Greenlandip hollandimiu nunani tamalaani misilittagalik atorfinitsikkaa

Hollandimiu, Robert-Jan Treebus ukiup nikinnerani Royal Greenlandimi nunani tamalaani tuniniaanermut akisussaasunngussaaq.

Royal Greenland tusagassiuutinut nalunaarummi allappoq.

Bruno Olesen ullumikkut akisussaasuusoq ukiup nikinnerani soraarninngortussaanera pissutigalugu Robert-Jan Treebuss atorfinittussanngorpoq.

Royal Greenlandip hollandimiu ’Royal Greenlandimut naleqqulluinnartutut’ nassuiaatigaa.

Tanna ukiut 25-t sinnerlugit niuernermik aamma nunani tamalaani niuernermik misilittagaqarpoq. Treebus kingullermik Advanced Power Solutionimi nittarsaassinermik tuniniaanermillu suliaqarluni atorfeqarpoq.

Robert-Jan Royal Greenlandimi novembarip 13-iani sulilissaaq, taassumalu Bruno Olesen ukiup nikinnissaata tungaanut qanimut suleqatigissallugu.

Robert-Jan Trebuss suliassaminut atatillugu ima oqaaseqarpoq:

- Royal Greenlandimi, suliffeqarfimmi oqaluttuassaqaqisumi, piujuartitsinermut tunniusimasumi, aalisakkanik qalerualinnillu tunisassianik pitsaalluinnartunik pilersuinermik ilungersuuteqartumi atorfininnissara tulluusimaarutigingaarpara, pisortanngortussaq tusagassiuutinut nalunaarummi oqarpoq.