Royal Greenland: Umiarsuatta eqqusseriaraluarnermut atorneqarnera nuanniippoq
Hashi 21 kiilu Royal Greenlandip kilisaataani Avatami ippassaq nassaarineqarpoq.
TV2 Nordjylland taama allaaserisaqarpoq.
Suliaq ilungersunartoq, Royal Greenlandip tunisassiornermi pisortaa, Lars Nielsen KNR-imut oqarpoq.
- Ajuusaarutigeqaarput. Umiarsuaatitta hashuimik Kalaallit Nunaannut anngiortumik eqqussinermut atorneqarniarsarisimanera uggoreqaarput, Lars Nielsen oqarpoq.
Danmarkimi akileraartarnermi oqartussat siusinnerusukkut umiarsuarmiissimapput, hashilu 1 kiilu tassani nassaarisimallugu. Politiit tamanna pillugu kalerrinneqarput, hashilu annertunerujussuaq taamaalilluni nassaarineqarluni.
AAMMA ATUARUK Royal Greenlandip kilisaataataasa ilaanni hashi annertooq politiinit nassaarineqartoq
Lars Nielsenillu oqarnera naapertorlugu haship eqqunneqannginnissaanut Royal Greenland ikioqataasimavoq.
- Malittarisassagut ersarissuupput. Umiarsuaatigut nunatta avataaniikkaangata nakkutigisuaannarpagut. Tamannalu ukuninnga nassaarnitsinnut aamma pissutaavoq. Tamanna umiarsuit nunatta avataaniissimagaangata nakkutigiuaannarnissaanut aalajangersimasumik periuseqarnitsinnik pissuteqarpoq, Lars Nielsen oqarpoq.
Hashi akisussaaffigineqarumanngitsoq
Kilisaat 22-nik inuttaqarpoq, hashi pineqartoq arlaannaanilluunniit attumassuteqarfigineqarumanngilaq, tamannalu pillugu suli tigusarinnittoqarani.
Lars Nielsenilu hashi sumi nassaarineqarsimanersoq pillugu ima oqarpoq:
- Umiarsuarmi ilaasut najugaqarfianni nassaarineqarpoq. Annerusumik oqaaseqarsinnaanngilanga.
Nordjyllandip politiivi takussutissat videokkullu assilisat atorlugit suliamik misissuileruttortut, TV2 Nordjylland allappoq.
Suliaq maanna politiiniittoq, tunisassiornermi pisortaq erseqqissaavoq.
- Kisianni uagut inuttatsinni peqataasoqarsimassappat, taava uagutsinni soorunami atorfeqarunnaassaaq, Lars Nilsen oqarpoq.