Royal Greenland 126 millionit koruuninik sinneqartooruteqarpoq

Royal Greenlandip 2018-imi sinneqartoorutai 126 millionit koruuniupput, ukiup siulianut naleqqiullugu 3 millionit koruuninik ikinnerullutik.

Suliffeqarfiup siorna kaaviiaartitai 2017-imut naleqqiullugit 400 millionit koruuninik ikinnerupput, tunisassiaasali piumaneqarluarnerat pissutaalluni isertitaqarneruvoq.

Royal Greenland Amerika Avannarlermi, Skandinaviami minnerunngitsumillu Kangiani siuariaateqarsimavoq, Royal Greenlandip kaaviiaartitaasa 30 procentiat Kangianeersuulluni.

AAMMA ATUARUK Nunatta karsia RG-ip sinneqartoorutaanit 64 millioninik iluanaaruteqartoq

- Kangia ukiuni kingullerni ukkassiffigaarput, tamatumanilu iliuusissatut pilersaaruterput naapertorlugu Kangiani ineriartortitserusunnerput maanna takussutissaqarlualerpoq. Atuisut aningaasaateqarneruleraluttuinnartut amerliartorput. Kinamiut ukiut tamaasa aalisagartortagaat qalerualittortagaallu Europamiut Amerikamiullu ukiut tamaasa aalisagartortagaannit qalerualittortagaannillu annertunerusarput, tunisassiavullu Kangiani piumaneqarneruleraluttuinnarmata pissuseqatigiiaanik nutaanik soorlu saattuanik saarullinnillu tuniniaavigisalissavarput, pisortaaneq Mikael Thinghuus oqarpoq.

Europami kaaviiaartitat ikiliartorput

Royal Greenlandip Europami kaaviiaartitai ikilingaatsiarput, Ruslandimi niuerfinni unammillernartoqartoq oqaatigineqarluni, Tysklandimilu tunsisassiornissaraluanik taamaatitsisoqarnera pissutaalluni siorna kaaviiaartitat 2017-imut naleqqiullugit ikilingaatsiarlutik.

Akileraareernermi ukiumut angusat 50 procentii aningaasanngorlugit 63 millionit koruuniusut piginnittunut agguagarsiassatut tunniunneqassasut innersuussutigineqarpoq. Tamanna suliffeqarfiup apriilip ulluisa 30-anni ataatsimeersuarnissaani aalajangiiffigineqarumaarpoq.

Royal Greenlandimi sulisut katillutik 2228-upput, taakkunannga 1487-it nunatsinni sulisuullutik.

AAMMA ATUARUK Royal Greenlandip Brexit ernumassutiginngilaa

Suliffeqarfiup ukiuni qulini kingullerni iluatsittumik ingerlassimasai 2019-imi ingerlatiinnarneqassangatinneqarput..