Rosing uteqqittoq
Mikael Rosing Inatsisartuni ataatsimiititaliani ilaasortaaffigisaminit oqaaseqartartuuffigisaminiillu partiip siulersuisuunerinit apriilip naalernerani tunuartinneqarpoq.
Suleqatigiinniarnermik ajornartorsiuteqarneq tunuartitsinermut pissutaasoq, partiip siulittaasuata Randi Vestergaard Evaldsenip KNR-imut taamani oqaatigaa.
Maannali avissaartuuttoqarunnaarpasippoq. Michael Rosingimi Demokraatit inatsisartuni gruppiannut utertoq, Randi Vestergaard Evaldsenip tusagassiuutinut nalunaarutigaa.
AAMMA ATUARUK Demokraatini suleqatigiinnermik ajornartorsiut avissaartuutsitsisoq
Ajornartorsiutit partiip inatsisartuni gruppiani, ulluinnarni aqutsisuini, Demokraatit Sermersuup kitaani immikkoortortaqarfianni illuatungeriinnit peqataaffigineqartumik sivisuumik aaqqiiviginiarneqarsimasut, tusagassiuutinut nalunaarummi allaqqavoq.
- Kingunerisimavaalu Michael Rosingip Inatsisartut gruppiannut uteqqinniarnera, Randi Vestergaard Evaldsen allappoq.
Ataatsimiititaliani ilaasortaagallassanngitsoq
Michael Rosingili ataatsimiititaliani ilaasortaaffigisaqaqqilernissaminut utaqqeqqaartariaqarpoq.
AAMMA ATUARUK Demokraatit avissaartuuttuarsinnartut
- Ataatsimiititalianut tunngatillugu inatsisartut 2017-imi upernaakkut ataatsimiinneranni allannguisoqarsinnaavoq - tassani Michael Rosing, ataatsimiititalianut inissinnissaminut allatuulli pisinnaatitaaffeqassaaq, Randi Vestergaard Evaldsen allappoq.
Partiimi nuimasoq, Poul Hansen, Demokraatit Inatsisartunut ilaasortaatitaanni sisamaasuni pingasut marlunnik atuuffeqarnerannut akerliunini ilaatigut pissutigalugu partiimit ungasinngitsukkut ilaasortaajunnaarpoq.
Aviisi AG naapertorlugu, arlalinnik atuuffeqarnermut isumaqatigiinnginneq Rosingip Demokraatillu inatsisartunut ilaasortaatitaasa avissaartuunnerannut pisuutaavoq.
Randi Vestergaard Evaldsen, Justus Hansen Nivi Olsenilu Inatsisartuni ilaasortaajutigalutik Kommuneqarfik Sermersuup kommunalbestyrelsianut ilaasortaapput.