Assi: KNR

Demokraatit avissaartuuttuarsinnartut

Poul Hansenip Demokraatinit aninini ullumi sisamanngornermi nalunaarutigaa - massakkut ingerlariaaseq atuuttoq akuersaarneqarsinnaanngilaq, Hansen KNR-imut oqarpoq.

Arlariinnik atuuffeqarneq soorlu Inatsisartuni kommuninilu ilaasortaasarneq pissutaalluni Demokraatini avissaartuuttoqarpoq. 

Poul Hansen, ukiorpassuarni Demokraatini ilaasortaavoq, partiilu sinnerlugu Inatsisartuni ilaasortaasut pingasut tamarmik Kommuneqarfik Sermersuumi kommunalbestyrelsemi ilaasortaaneri akerleralugu maanna partiimit tunuarpoq. 

- Tunniusimalluinnarlutik sulerusuttut, assersuutigalugu kommunimi, periarfissinneqanngillat, Hansen KNR-imut oqarpoq. 

Atuagagdliutini sapaatip akunnerani matumani allaaserineqarpoq, Mikael Rosingip arlariinnik atuuffeqartarnermut akerliunini pissutigalugu Inatsisartuni ataatsimiititaliani ilaasortaaffigisaminit oqaaseqartartuuffigisaminiillu peersinneqarsimasoq.

AAMMA ATUARUK Demokraatini suleqatigiinnermik ajornartorsiut avissaartuutsitsisoq

Poul Hansenip nammineerluni marlunnik atuuffeqarneq misilittagaqarfigaa, taamaammallu oqaatigisinnaallugu taamatut suleriaaseqarneq pitsaasuunngitsoq. Taassuma aamma oqaatigaa arlalinnik atuuffeqarneq Demokraatit politikkiannut naapertuutinngitsoq.

- Partiini siullerpaalluta arlalinnik atuuffeqarnermut akerliusareerpugut, Hansen oqarpoq. 

Partiimut allamut nuunnisani ammaffigaa

Poul Hansenip politikkeriuinnarnissani oqaatigaa, oqaatigalugulu partiinit tamanit tikilluaqquneqareersimalluni. 

- Inuit Ataqatigiit, Siumup aamma Partii Naleqqap partiiminnut ilaasortanngortikkusuppaannga. Inuuniarnikkut ajornartorsiutillit uummateqarfigaakka, taamaammat partiimi eqqortumi inissisimannginnera siornatigut oqaatigisareerpara. 

Issiaveqanngitsoq

Demokraatit Naalakkersuisooqatigiinnit peersitaanngikkallarmata Hansen Inatsisartuni sinniisutut issiavoq. Kommunimullu qinersisoqarmat sassaraluarluni isinngitsoorluni, tassani Nivi Olsen, Randi Vestergaard Evaldsen aamma Justus Hansen isermata. Taakku tamarmik Inatsisartuni aamma ilaasortaapput. 

Partiip siuttui unammillerneqarsinnaannginnerata kinguneranik politikkerit Poul Hansenitut Tillie Martinussenitullu ittut politikkikkut sunniuteqarnissaminnut periarfissaqanngillat.

- Periarfissaqanngilagut. Tamannalu akuersaarneqarsinnaanngilaq, Poul Hansen naggasiivoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat