USA-p præsidenteriligassaata Donald Trumpip Kalaallit Nunaannik pisisinnaanissamik Danmarkimut isumaqatigiinniarsinnaanissaanut ammaassisumik, USA-mi inatsisartut aappaanni, inuttaasut sinnerlugit sinniisoqarfimmi, tassa Repræsentanternes Husimi republikanerit inatsisissatut siunnersuummik saqqummiussilersaarput.

Nutaarsiassaqartitsiviit Fox News Axiosilu taama allapput.

Fox Newsip nutaarsiassaq siulliullugu saqqummiuppaa, "Make Greenland Great Again Act"-imimmi taallugu inatsisissatummi siunnersuut naqitanngorlugu pissarsiarisimavaa.

Inatsisissatut siunnersuutip USA-mi inatsisartuni amerlanerussuteqartunit tapersersorneqarnissaa pingaaruteqartoq, Fox News allappoq. Trumpimmi Kalaallit Nunaat pisiariniaruniuk inatsisissatut toqqammavissaqartariaqartoq, Fox News allappoq.

Inatsisissatut siunnersuut "Make Greenland Great Again Act", inatsisissatut siunnersuutit arlallit akornanniippoq, Trumpip politikkikkut anguniagai iluatsissappata siunnersuutit arlallit akornanniilluni.

Panamami ikerasaliaq pillugu inatsisissatut siunnersuut aamma piareersarneqarsimavoq, soorlu aamma Mexicop Kangerliumanersuata taaguutaata Den Amerikanske Golfimut allanngortinneqarnissaanut inatsisissatut siunnersuut piareersarneqarsimasoq.

Nunarput pillugu inatsisissatut siunnersuut qaqugu taasissutigineqassanersoq suli ilisimaneqanngilaq. Inatsisissatut siunnersuut akuersissutigineqassappat USA-mi demokratit akuerseqataasariaqassagunartut, nutaarsiassaqartitsivik Axios allappoq.

Andy Ogles, republikanerillu Repreæsentanternes Husimi ilaasortat qulit allat, siunnersuusiortuupput, republikanerit akornanni talerperliuniat The Freedom Caucusimeersuullutik.