Naalakkersuisut danskit innuttaasut IT-kkut illersorneqarnerat qulakkeerniarpaat
Danmarkimi naalakkersuisut taama isumaqarput. Qarasaasiatigut suliat paasissutissallu illersorneqarnissaat pillugu iliuusissatut pilersaarutertik taakku saqqummiuteqqammerpaat.
Aningaasat 1,5 milliardit koruunit qarasaasiatigut suliat illersorneqarnerunissaat pillugu suliniummut atorneqassapput.
Nunat soorlu Rusland qarasaasiat aqqutigalugit saassussisartutut aarlerinaateqarnerpaasut, Danmarkip illersornissamut ministeriata Claus Hjort Frederiksenip oqaatigaa.
- Qarasaasiatigut suliat paasissutissallu illersorneqarnissaat pillugu iliuusissatut pilersaarut illersornissaq pillugu isumaqatigiissummut tapertatut isigineqassaaq, paasissutissammi qarasaasiatigoortut illersorneqarnissaat isumaqatigiissummi ilaavoq, ministeri oqarpoq.
Paasissutissanik avataanit tillinniartoqartillugu suligasuarsinnaasussanik pilersitsisoqarniarpoq, taakkulu qitiusumik allattoqarfeqassallutik.
Aamma naalagaaffiup it-mik atortuinik nakkutiginninneq isornartussarsiornerussaaq, taavalu ataatsimoortumik allaffeqalissalluni, suliffeqarfiit oqartussaqarfiillu it-mik ajutoornermi nalunaartarfissaannik.
Inuit ataasiakkaat pillugit paasissutissat soorlu kinaassutsimut tunngasut, pasit, biilinik ingerlatsisinnaanissamut allagartat NemID-llu isumannaannerusumik aqunneqarnissaat Danmarkimi naalakkersuisut aamma suliniutiginiarpaat.
