ARCTIC CIRCLE Randi V. Evaldsen: Iliuuseqartariaqalerpugut
- Arctic Circle Forumimut tikilluaqqusinnaagassi tulluusimaarutigalugulu nuannaarutigaara, Arctic Circle Greenland Forumimut peqataasunut tikilluaqqusilluni inuussutissarsiornermut naalakkersuisoq, Vittus Qujaukitsoq oqarpoq.
Aningaasaqarnermut Naalakkersuisoq, Randi Vestergaard Evaldsen, siullertut oqaaseqartuuvoq, tassungalu atatillugu partiit illuatungiliuttut, tusagassiuutit innuttaasullu isornartorsiorpai.
Randi Vestergaard Evaldsen naapertorlugu aningaasaqarnikkut sipaaruteqarnissaq aaqqissuusseqqinnerillu, assersuutigalugu utoqqalinersiutinik aaqqiissuteqarneq, innuttaasut partiillu illuatunngiliuttut akuerinngikkaat oqaatigaa, itisilerpaalu.
-Tamattami aaqqiissutinik eqqartuivugut, ukiorpassuarnilu eqqartornikuullugit, maannakkullu utaqqisinnaajunnaarpugut. Aaqqiissuteqarnerillu eqqartuinnarnagit iliuuseqartariaqalerpugut, Randi Vestergaard Evaldsen KNR-imut oqarpoq.
Taannalu isumaqarpoq nunarput aalajanngertariaqalersoq. Nunarpummi aningaasarnikkut ineriartussappat sukasaasariaqarpugut.
-Tamassuma inuppassuit assigiinngitsutigut eqqussavai. Qanorlu ataatsimut inuiaqatigiinnut isumaqarnersoq eqqarsaatigineqanngilaq, Randi Vestergaard Evaldsen oqarpoq.
Arctic Circle Forumimi, issittumeersut allat oqalugiaatigisarpassui, nunatta aningaasaqarnerata ineriartortinnerani atorluarneqarsinnaaneri, aningaasaqarnermut naalakkersuisup nuannaarutigaa:
- Attaveqarfeqalernissaq, nunatsinnilu pissutsit pillugit oqaloqateqarnissara naatsorsuutigaara, aningaasaqarniarnikkullu aaqqiissutaasinnaasunik siunnersorneqarsinnaalluta. Tamannami isumassarsiffigisinnaagatsigu soqutiginartorujussuuvoq, Aningaasaqarnermut Naalakkersuisoq, Randi Vestergaard Evaldsen oqarpoq.
