RAL umiarsuarujussuarmik sanaartortitsilersoq
Umiarsuaq meterinik 180-inik takitigissaaq meterinillu 31-nik silissuseqassalluni. Umiarsuaq RAL-ip maanna umiarsuaataanut naleqqiullugu containerinik usisinnaasai pingasoriaammik amerlanerussapput.
Umiarsuaq Royal Arctic Linep, RAL, Kinami umiarsualiorfimmut Guangzhou Wenchong Shipyard Co. Ltd aamma China Shipbuilding Trading Company Limitedimut sanaartortinniarlugu imissutigisaa taama angitigissaaq. RAL tusagassiorfinnut nalunaaruteqarluni taama allappoq.
AAMMA ATUARUK Aarhusip Umiarsualivia Royal Arctic Linep siunissami atorniaraa
Umiarsuartaassap Naja Arctica aamma Nuka Arctica maanna ukiunik 25-nik pisoqaassuseqalersut taarsissavai. Umiarsuup 2019-imi tunniunneqarnissaa naatsorsuutigalugu RAL ilisimatitsivoq.
Eimskip isumaqatigiissuteqarfigigaa
Umiarsuarmik pisinissamik isumaqatigiissuteqarnermi saniatigut, RAL-ip islandimiut umiarsuaatileqatigiiffiannut Eimskippimut isumaqatigiissuteqarpoq. Suliffeqarfiit taakku marluk umiarsuaatimik naammassisinnaasaat atorluarniarlugu isumaqatigiissutigaat, isumaqatigiissutaalli oqartussanit attuumassuteqartunit suli akuerineqanngilaq.
RAL naapertorlugu, suleqatigiinneq ingerlallualerpat Nunatsinnit ilaatigut tunisassianik ineriikkanik avammut nioqquteqarnissaq ajornannginnerulissaaq.
- Royal Arctic Line Kalaallit Nunaata ajornannginnerusumik niueqatiginissaanik anguniakkanimut atatillugu, suliniutini marluk pillugit ingerlaavartumik ilisimatitsisassaaq, umiarsuaatileqatigiiffik tusagassiorfinnut nalunaarummini taama allappoq.
AAMMA ATUARUK Eimskip Royal Arctic Line peqatigalugu umiarsuarnik pisinissamut piareertoq
