Eimskip Royal Arctic Line peqatigalugu umiarsuarnik pisinissamut piareertoq

Royal Arctic Line suleqatigalugu umiarsuarnut Atlantiku ikaarlugu assartuisartunut pingasunut aningaasaleeqataaniarnertik, Islandimiut umiarsuaatileqatigiiffiata Eimskipip pisortaanerata Gylfi Sigfússonip Islandimi tv-kanalikkut Kanal 2-kkut aallakaatinneqartumi apersorneqartilluni uppernarsarpaa.
Assi © : Corey Templeton/Flickr Creative Commons
Allattoq Anton Gundersen Lihn
oktobarip 27-at 2016 06:57
Nutserisoq Mads Lynge

Umiarsuit pineqartut 2150 TEU-tut pisagaannik angitiginissaat pilersaarutigineqarpoq.

Umiarsuup angissusaanut uuttuut TEU tassaavoq containereqarsinnaassusianut tunngasoq. TEU-p ataatsip assigaa containeri 20 foditut angitigisoq.

Royal Arctic Linep umiarsuaatai anginerpaat marluk, Nuka aamma Naja Arctica, tamarmik immikkut 782 TEU-jupput. Allatulluunniit oqaatigalugu: Maanna pisiariniarneqartut 2150 TEU-jusussat pingasoriaatingajammik angitigipput.

Aamma atuaruk Royal Arctic Line Eimskip suleqatigalugu nutaanik umiarsuarsiniartoq

Umiarsuit assartuutit pisiarineqartussat Nunatsinnukartarnermi saniatigut aamma Islanditigoorlutillu Savalimmiunukartassapput.

Aarhusip umiarsualiviata assartuussinermut atatillugu atorneqartarnissaa, Gylfi Sigfússonip apersorneqartilluni oqaatigaa, umiarsuaatileqatigiillu Atlantikup avannaa pingaaruteqartutut taavaat, Savalimmiullu matumani aamma eqqarsaatigineqarluni.

Europamut Amerikallu nunavittaanukartarnissaq, siunissaq ungasinnerusoq eqqarsaatigalugu aamma pilersaarutaasoq, Eimskipip pisortaanerata oqaatigaa, USA-mi Canadamilu umiarsualiviit tikinneqartalernissaat
takorloorneqarluni.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk