RAL qiimmattarpoq: Umiarsualivik Nunatta tamarmi ilaqutigissavaa
Naalakkersuisut siuliisa Nuummi umiarsualiviup allilerneqarnissaaniik aalajangiussaqarsimanerat Siumup naalakkersuisuutitaanit ingerlateqqinniarneqanngitsioq ippassaq pisortatigoortumik nalunaarutigineqarpoq - naak taamatut pisoqarnissaa eqqartorneqarsimagaluartoq.
Nuuk - Sisimiutulli - nutaamik umiarsualivittaassaq. Taannalu 2016-imi naammassineqarsimassaaq, Nunattalu assartuussiviata kommunillu illoqarfiit pingaarnersaata inissisimaffigisaata taamatut nalunaaruteqartoqarnera nuannaarutigaat.
- Umiarsualiviup allilerneqarnissaanik aalajangiussaqarsimanerup attatiinnarneqarnissaanik Naalakkersuisut aalajangersimanerat nuannaarutigaarput, Royal Arctic Linemi pisortap tullia John Rasmussen oqarpoq.
Illoqarfiit pingaarnersaata nutaamik anginerusumillu umiarsualiveqalernissaa RAL-ip qangali kissaatigisimavaa, oqaluttuarpoq nangillunilu:
- Sivisuumik pisariaqartumilli suliarineqarsimavoq, aammali assartuussineq pillugu isumalioqatigiissitaq suleqatigiissitallu Namminersorlutik Oqartussanit, Kommuneqarfik Sermersuumit Ålborg Havnimillu atorfilittanik peqataaffigineqartut peqatigalugit akunnerpassuit sulisimavugut.
Kommuneqarfik Sermersuumi borgmesteri, Asii Chemnitz Narup, suli utaqqimaarallarpoq, umiarsualiviup aningaasalersorneqarnissaata immikkuualuttortai inaarutaasut ukiakkut ataatsimiinnissami aatsaat saqqummiunneqassammata. Siullertulli umiarsualiviup ingerlateqqinneqarnera nuannaarutiginerarpaa:
- Piffissaliussap pioreersup attatiinnarneqarnissaa Naalakkersuisut neriorsuutigaat, tassalu umiarsualivittaassap 2016-imi naammassineqarsimanissaa, Nunatsinnut tamarmut iluaqutaasussanngorluni. Pitsaaqutissartai isiginiarnerussagiguk isumaqarpunga, borgmesteri Radioaviisimut oqarpoq.
Nuup Umiarsualivia ukiuni kingullerni qulini ulapaarfiuleriartuinnarsimavoq. 2002-miilli 28 procentinik annertusaasoqarsimaneranik Royal Arctic Line oqaluttuarpoq.
Allatulluunniit isumaqartoqaraluarpat, Nuummi umiarsualivittaaq Nuummi innuttaasunuinnaq suliffeqarfinnullu iluaqutaassanngilaq. Umiarsualik naammassineqariarpat akit assartuussinerullu sivisussusaat nunarput tamakkerlugu appartinneqassapput, pisortap tullia John Rasmussen oqarpoq:
- Kalaallit Nunaannut tamarmut iluaqutaassaaq.
40 millioner koruunit Kommuneqarfik Sermersuup umiarsualiviornissamut illikartissimasai, aqqutilersuutinut allanut aningaasalersuinissamut atorneqartussanngorput. Borgmesterip nammineq eqqaavaa, illoqarfimmi biilinut usisaatilinnut angisuunut aqqusinertigut aaqqiissuteqartoqarnissaa kissaatigalugu.
Asii Chemnitz Narup umiarsualiviornissamut aningaasaqarnikkut ilusiliaq nangaassutigilaarpaa, taannami "paasissaanngitsutut" taavaa. Aningaasaqarnermut Nunamilu namminermi pissutsinut naalakkersuisoqarfimmit allakkiami allassimavoq 687 millioner koruunit umiarsualiviliornissamut atugassat "atuisut akiliuteqarnerisigut pisariillisaanikkullu" pissarsiarineqassasut.
