3F: RALimi sulisut pakatsipput
![](/sites/default/files/styles/image_934x467/public/article_images/groenlandshavnen_aalborg_googlemaps.png?itok=wvfD1txd)
Royal Arctic Linep Aalborgimi sulisuisa naammaginngilaat, suliffeqarfiup Aalborgimiit Aarhusimut nuunneqarnissaanut aalajangerneq suliffeqarfimmi aqutsisunit tusarnagu tusagassiorfitsigut tusaramikku.
- Allamik aalajangertoqarsimaneq pillugu inuit toqqarlugit issaatigut isigalugit oqaluttuarusussimannginneq qunutuutut taasariaqarpoq, RAL-ip pisortaa Verner Hammeken sulisunut oqaluttuarsimasariaqaraluarpoq,
sulisartut kattuffianni 3F-imi assartuisut peqatigiiffianni Transportgruppenimi siulittaasup tullia Ole Nors Nielsen taama oqarpoq.
Aalborgimi RAL-imi sulisut sulinertik pingasunngornermi unitsippaat, sulinertillu aallarteqqissanerlugu sisamanngornermi ullaakkut aallajangissallugu.
Sulinermik isumaqatigiissutit unioqqutillugit sulineq unitsinneqarpoq, taamaattumik Ole Nors Nielsenip ilaasortani kaammattorpai suliatik aallateqqissagaat
AAMMA ATUARUK RAL-ip umiarsuai Aarhusimut tulattalissapput
Pakatsineq paasisinnaalluaraa
Royal Arctic Linemi sulisut 65-it pisoq pillugu tusagassiuutini tusarsimallugu pakatsinerat OLe Nors Nielsenip paasisinnaalluarnerarpa.
Sulisut ilaat ukiuni 40-ni sulisimavoq, Ole Nors Nielsenillu oqarnera naapertorlugu, suliffigisartik matuneqarniarpat tamanna pillugu tupassimaqaat.
Suliffigisap matuniarneqarnera paasillugu qanoq ikkaluaraanniluunniit pakatsissutigineqartuaannarsinnavoq.
Taama eqqarsarneq pissusissamisuuinnarpoq, taamaatumik Ole Nors Nielsenip qularaa, pissutsit iluarsineqarnissaannut umiarsuaatileqatigiiffiup iliuuseqarsinnaanera.
- Inortuereerput, RAL-imi aqutsisut Verner Hammeken siuttoralugu, pisunut attuumassuteqartut siulliullugit oqaluttuussimanngimmatigit, sulisartut peqatigiifianni Transportgruppemi siulittaasup tullia Ole Nors Nielsen taama oqarpoq.
AAMMA ATUARUK Aalborgip umiarsualiviata Royal Arctic Line tatiniarsarigaa
Royal Arctic Line pisortaa Verner Hammeken KNR-imit oqaaseqartinniarneqaraluarpoq tamannali iluatsissinnaasimanngilaq.