RAL-ip assartuinini ajornartorsiutigigaa

Royal Arctic Linep nassiussannik assartuinini ajornartorsiutigisorujussuuaa.

Containerit 88-it sapaatit akunnerini 26-mi 27-milu assartorneqanngitsoorsimanngikkunik illoqarfinnut kukkusunut usingiarneqarsimapput. Royal Arctic Line nittartakkamini taama allaaserisaqarpoq.

Sapaatit akunnera 27 ajornartorsiorfiunerpaavoq. Tassani containerit 55-it pilersaarutigineqartutut umiarsuarnut ikineqanngitsoorput.

AAMMA ATUARUK RAL-imi inniminniinermi sullississut nutaaq Brugsenimut ajornartorsiutaasoq

Containerit taakku affangajaat Aasiannit assartorneqartussaagaluarlutik uninngaannarput.

Kukkussutit taakku aaqqissuussanit suleriaatsiniillu nutaanit aammalu sulinermik aaqqissuusseqqinnermit pissuteqartut Royal Arctic Linemit nassuiaatigineqarpoq.

Containerit pilersaarutigineqartutut usineqartaleqqinnissaat usingiarneqartaleqqinnissaallu umiarsuaatileqatigiiffiup sulissutigilereerpai.

AAMMA ATUARUK Pisisartut RAL isornartorsioraat

Sapaatit akunneri marluk pingasulluunniit missaanni nutaanik kukkussuteqartarunnaarnissaq Royal Arctic Linemit naatsorsuutigineqarpoq, sapaatilli akunnerini tallimani arfineq-marlunniluunniit nalinginnaasumik assartuusseqqittoqartalerumaartoq naatsorsuutigineqarluni.

Sullinneqartulli assartuinermi pitsannguutinik siusinnerusukkut malugisaqarsinnaanissaat naatsorsuutigineqarpoq.