Pisisartut RAL isornartorsioraat

RAL-ip imaatigut angallassinermi kisermaassisuuvoq akisussaaffimminillu sumiginnaavoq, 
Sulisitsisut Peqatigiiffiat GE taama isumaqarpoq.

Tamannalu pissuteqarpoq, kiffartuussinikkut pitsanngorsaanissaq anguniarlugu RAL-i 
nunatsinniit imaatigut angallassineq pillugu iliuusissamik nutaamik aallartitsimmat.

Pisisartut eqqugaasut

GE-miillu ilisimatitsissutigineqarpoq, suliffeqarfippassuit RAL-imi kiffartuussinermi 
ajornartorsiuterpassuit pillugit pakatsisorpassuit GE-mut saaffiginnittartut. 

- Kiffartuussinermi ajornartorsiutit suliffeqarfinni sullitanut sunniuteqarnerluttarpoq, 
pisiniarfinnimi nioqqutissat amigaatigineqarnerat pisisartunit paasiuminaatsinneqartarpoq, 
GE-mi pisortaq, Brian Buus Pedersen tusagassiutinut taama nalunaaruteqarluni allappoq. 

RAL-ip aqutsisui aaqqiissutissanik nutaanik misiliiniarnerat GE-p paasilluarsinnaavaa, 
assartuinerullu iluani allanngortiterinerit qanoq iluaqusiiumaarnissaannik uppernarsaatissat, 
Sulisitsisut Peqatigiiffiannit ilaasortarisaannillu amigaatigineqarput.