Naatsorsuutit: RAL amigartooruteqaraluarluni neriuuteqartoq
Suliffeqarfiup 54 millionit koruuninik amigartooruteqarnera, ukiup qanoq ilinera malillugu suliassakinnerullunilu suliassaqarnerulersarneranut sanilliunneqassasoq, Peter Christoffersenip oqaatigaa:
- Ukiup qanoq ilinera aallaavigalugu suliassaqartarnitta naatsorsuutitsinnut ilanngunneqartarnera takornartanngilaq, umiarsuaatileqatigiiffiup sulineranut tamanna ilaalluinnarpoq. Umiarsuaatileqatigiiffiup kaaviiaartitaasa amerlanersaat ukiup affaata aappaaniipput, ukiullu affaata siulliani amigarooruteqaraluarluta ukiup 2018-ip sinnerani kaaviaartitaqarluarnissatsinnut isumalluarpugut, tamannalu iluarisimaarparput, Royal Arctic Linep aningaasaqarnermut pisortaa Peter Christoffersen oqarpoq.
AAMMA ATUARUK Royal Arctic Line aatsaat taama sinneqartoortigisoq
Umiarsuarnut assartuutinut nutaanut aningaasartuutit, qarasaasiatigullu ukiuni kingullerni pitsanngorsaanerit, nalikillisaanerillu assigiinngitsut, suliffeqarfiup naatsorsuutaanni takuneqarsinnaalersut, Peter Christoffersenip oqaatigaa, suliffeqarfiup amigartooruteqarneranut takussutissaasut oqaatigalugu.
Aningaasat kaaviiaartinneqartut ataatsimut isigalugit suliffeqarfiup ingerlalluarneranut takussutissaapput, aningaasaqarnermut pisortaq oqarpoq.
AAMMA ATUARUK RAL-ip nunaqarfinnut umiarsuaaqqat nutaat marluk inniminnerai
- Umiarsuaatileqatigiiffiup kaaviiaartitaasa eqqaamasakka malillugit siornamut naleqqiullugit ukioq manna 22 millionit koruunit missaannik pitsaanerupput, suliffeqarfiullu siuariartorneranut tamanna takussutissaavoq, Peter Christoffersen oqarpoq.
Umiarsuarnik nunaqarfiliartaatinik tamavinnik taarsersuinissamut nutarterinissamullu suliaq 2018-imi qaammatit siulliit arfinillit ingerlanerini Royal Arctic Linep aallarnisarpaa, nunaqarfiliartaatinik nutaanik sisamanik inniminniinermigut.
Akileraarutit suli ilanngaatiginagit 2-15 millionit koruunit akornanni sinneqartooruteqassalluni suliffeqarfiup naatsorsuutigaa, tamannalu suliffeqarfiup aningaasaliisutut suleqatigisaasa ilimagisaannut naapertuulluinnarpoq.
