RAL-p pisortaa: Aalborgimi sulisut ilisimatinneqareernikuupput

Royal Arctic Linep umiarsuaasa kingusinnerpaamik 2022-mi Jyllandip avannaanukartarunnaarnissaannik tusagassiutitigut nalunaaruteqarneq ingerlatseqaatigiiffiup Aalborgimi sulisuinik ataqqinninngineruvoq.

Sulisut 3F-imut ilaasortat sinniisuat, Michael Gregersen, taama isornartorsiuivoq.

RAL-illi sulisui qangali paasitinneqareersimasut, RAL-ip pisortaanerata, Verner Hammekenip, KNR-imut oqaatigaa.

- Aallaqqaataaniilli ilisimatinneqareerput. Taamatut suliniuteqarusulluta 2015-imi oktobarimi oqaatigaarput, 2016-imilu oktobarimi taamaaliornissarput siunniussimallugu erseqqissumik oqaatigaarput. Taamaammat Aalborgimi sulisut qaammatit qulingiluat matuma siorna ilisimatinneqareerput.

AAMMA ATUARUK RAL's kunder fokuserer på prisen

Aalborg Havn A/S-imilli qaammatini kingullerni nalunaarutigineqartarpoq RAL-imut isumaqatigiinniartoqartoq.
Isumaqatigiinniarnerillu taakku - imaassinnaasoq - umiarsuaatileqatigiiffiup manna isumaqatigiissutip atuuttup 2022-mi atorunnaarnissaata tungaanut - immaqalu sivisunerusumik -  Aalborgiliartarnerata ingerlatiinnarnissaanik angusaqarfiusut.

Verner Hammekenilli tamanna ilumuunnginnerarpaa.
- Tusagassiorfinnut nalunaaruteqannginnitsinni Aalborg Havn allakkatigut ilisimatereerparput. Aamma erseqqissaatigissavara Aalborg Havnimut isumaqatigiissuterput atorunnaarsinnginnatsigu. Isumaqatigiissut 2022-p kingorna sivitsorniarnagu nalunaarutigaarput, taamaammat pitsaanerpaassagaluarpoq 2019-imi juunimi atorunnaarnissaanut aporfiusinnaasut qaangernissaat ikioqatigiissutigigaluarutsigit.

AAMMA ATUARUK RAL-imi sulisut ullut pingajussaanik suliumajunnaaqqasut

Hammeken naapertorlugu, Aalborg Havn A/S-ip isumaqatigiinniarfiginissaa ajornakusoorsimavoq. Tamannalu tunngavigalugu RAL-ip umiarsualiviup kingusinnerpaamik 2022-mi atorunnaarnissaa tamanut nalunaarutigisariaqarlugu toqqarsimavaa.

Aalborg Havn A/S-ip isumaqatigiinniaqatiginissaa siunertaralugu taamaaliorpugut. Maannamummi taamaaliorumasimanngillat. Aalborg Havnimit nalunaarutigineqartartuni aammaassilernerat maanna takusinnaalerparput, tamannalu iluareqaarput.

AAMMA ATUARUK RALimi sulisut pakatsipput

Aarhusimut nuunnermi RAL-ip Aalborgimi atorfiit 110-t atorunnaarsissavai. Sullitanillu kiffartuussivimmi atorfiit aqqaneq-marluinnaat pigiinnarneqassasut RAL-ip ilisimatitsissutigaa.