Raiponip matunera Issittumi Siunnersuisooqatigiinnut sunniuteqarpoq
- Raiponip matuneqarnerata kingorna Issittumi Siunnersuisooqatigiinni ataatsimiinnerit aaqqissuussinerillu Raiponip peqataaffigisinnaajunnaarpai, piffissamimi tassani piujunnaarsinneqarsimammat. Taamaammat aap, kinguneqarnerluppoq.
Raiponimi siulittaasup tullia, Aleksai Limanzo, Issittumi Siunnersuisooqatigiit ataatsimiinnissaat, Kirunami pingasunngorpat pisussaq, sioqqullugu taama oqarpoq.
Raipon, Ruslandip avannaani nunap inuiinit 41-nit peqataaffigineqarpoq - inuillu millionip sisamararterutai sinniisuuffigalugit - suliniaqatigiiffillu russit inatsisinik atortitsinermut ministeriaqarfianit novembarip qaammataani matuneqarpoq. Suliniaqatigiiffiup inatsisinut naapertuutinnginnera tunngavilersuutigalugu taamaaliortoqarpoq, ilaatigut suliniaqatigiiffiup ukiuni 20-ni ilisarnaatigisimasaa oqartussaasunit nalunaarsorneqarsimanngimmat.
Matusineq arlalinnit isornartorsiorneqarpoq, pingaartumik Ruslandip nunap immikkoortuini avannarpasinnerusuni suliffissuaqarnikkut ineriartortitsinissamik pilersaaruteqarnera Raiponimit isornartorsiorneqarnera pissutigalugu.
- Raiponip maannakkorpiaq atorunnaarseqqaneqarnera uanga nammineerlunga tupigusuutigivara. Raipon ukiorpassuarni atuussimavoq, aamma ministerip inatsisiliorneq Raiponillu maleruagassai siornatigut ajornartorsiutiginikuunngilai, Aleksei Limanzo matusineq kikkunnit tamanit isornartorsiorneqangaatsiartoq pillugu taama oqarpoq. Isornartorsiuisut ilagaat ICC aamma danskit nunanut allanut ministeriaqarfiat.
Aammattaaq Issittumi Siunnersuisooqatigiit Raiponip Issittumi Siunnersuisooqatigiikkunnaarnera ernumanartoqartillugu ataatsimoortumik nalunaaruteqarsimapput. Raipon sulinerminik marsip 15-iani ingerlatseqqinnissaminut akuerineqarpoq, Issittumilu Siunnersuisooqatigiit Sverigemi Kirunami pingasunngorpat ataatsimiinnissaannut peqataajartortitaqarluni.
Raipon apriilip qaammataani nutaamik siulittaasortaarpoq. Siulittaasuusimasup Pavel Sulyandzigap qinersinerup immikkoortuata pingajuani tunuarnerata kingorna, Grigory Ledkov, Putinip partiianit "Rusland Ataasiusoq"-meersoq, siulittaasussarsiornermi ajugaavoq. Siulittaasumik qinersineq russit oqartussaasuisa uukapaatitsinerisigut pisimasutut isornartorsiorneqarsimavoq.
