Qularnarunaarpoq: Qinersissaagut - ullussaali suli aalajangerneqanngilaq

Inatsisartuni piffissami sivisuumi oqallittoqareersoq qinersinissaq pillugu nalunaarut piareerpoq:

Nunatsinni qinersisoqassaaq.

Naalakkersuisuni maannamut - akunnerni pingasunngortuni oqallittoqareersoq qularnarunnaarpoq.

- Tusarnaarpassi. Qinersisoqarnissaanut ullumi aalajangiinissaq amigaatigiinnarparput, Naalakkersuisut siulittaasuat, Kim KIelsen (S) oqarpoq.

Ullussaami suli aalajangerneqanngilaq. Qinersisoqarnissaanut siunnersuut naapertorlugu apriilip ulluisa arfernanni qinersisoqassaaq. Inuit Ataqatigiilli Nunatta Qitornaalu isumaqataanngillat. Ullormi apriilip ulluisa arfernat kommunimut ilagiinnullu qinersinissat aamma ulloraat - taamaammat qinersinerit taakku Inatsisartunut qinersinermit pingaannginnerutinneqarsinnaasut partiit marluk isumaqarput.

AAMMA ATUARUK Partiit: Inatsisartunut kommuninullu qinersineq ullormi ataatsimi ataatsikkuussanngillat

Illuatungiliuttut tassa Inuit Ataqatigiit, Demokraatit, Partii Naleraq Atassullu tusagassiuutinut naatsumik nalunaaruteqarnerminni partiit sisamaallutik Inatsisartunut qinersisoqarnissaanik suaaruteqartoqarnissaa kaammattuutigalugu ippassaq nalunaaruteqarput.

Inatsisartut qinersisoqarnissaanut siunnersuut akueraat - Inatsisartullu sammisaq taanna nalunaaqutaq aqqanermulli oqallisigilerpaat.

Kielsen: Pakatsinata

Qinersinissaq isumatsialaanersoq pillugu politikerit oqallinnissaata aallartinnginneranni Naalakkersuisut siulittaasuat, Kim Kielsen (S) oqaaseqartarfiliarpoq.

- Suleqatigiissimanitsinnut tamassi qujaffigerusuppassi. Paasinninnerit isummat assigiinngillat angusalli pitsaasut tamassi peqataaffigaasi.

- Qanorluunniit pisoqaraluarpat aliasuutiginagulu pakatsissutigissanngilarput, amerlanerussuteqartulli isumaat ataqqillugu, Kim Kielsen oqarpoq.

Siumullu siulittaasortaavata, Erik Jensenip nunatsinni partiit annersaata piumasaqaateqartoqarnera akisussaaffigalugu oqaaseqartarfimmit nassuerutigaa.

AAMMA ATUARUK Siumut: Timersortartulluunniit aallaqqusaanngitsut qinersinissammut piffissaanngilaq

Taassuma qinersisoqarnissaa kissaatiginngikkaluarpaa – Inatsisartunili amerlanerussuteqartut qinersisoqarnissaa kissaatigippassuk ”taava partiip akisussaaffini qimarratigissanngikkaa, taanna oqarpoq.

Qinersisartut isumaannik misissuineq sapaatip akunnerata siuliani saqqummersinneqartoq naapertorlugu illuatungiliuttut partiianni partii annerpaaq tassa Inuit Ataqatigiit siuariangaatsiaqqavoq: Isumasiuineq naapertorlugu partii taanna 38,4 procentinit qinerneqarluni nunatsinni partiini qinigaanerpaassaaq.

Taamaattoqassappat Inuit Ataqatigiit Inatsisartuni qinigaaffinnit 31-nit 13-inik qinigaatitaqassalluni.

AAMMA ATUARUK IA qinersisartunik isumasiuinermi nutaami siuariaqisoq

Qinersinissaq Naalakkersuisuni Siumullu iluani sapaatini akunnerni marlunni pisoqangaatsiareernerani suaarutigineqarpoq.

Demokraatit naalakkersuisoqatigiinnit sapaatip akunnerata siuliani tunuarput – taamaammat Siumut Nunatta Qitornaalu kiserngorullutik ikinnerussuteqarlutik naalakkersuisoqatigiilerput. Taakku Inatsisartunut qinigaaffinnit 31-nit aqqaniliinnarnik qinigaatitaqarput.

Illuatungiliuttut taamaalillutik ersarilluinnartumik amerlanerussuteqalerput. Taakku inissanit 31-nit 19-inik inissisimaffeqarput.

Nunatsinni kingullermik 2018-imi upernaakkut qinersisoqarpoq. Qinersineq tulleq kingusinnerpaamik 2022-mi pissaaq.