Partiit: Inatsisartunut kommuninullu qinersineq ullormi ataatsimi ataatsikkuussanngillat
Qinersinerit pingasut ullormi ataatsimi pissanngillat.
Inuit Ataqatigiit Inatsisartunut qinersinissap suaarutigineqarnissaata ilimanarluinnarnerani ullormi taama oqarput.
AAMMA ATUARUK Maannakkut: Illuatungiliuttut qinersisoqarnissaanik piumasaqartut - Kim Kielsenilu tamanut qujassuteqartoq
Qinersisoqarnissaanik siunnersuut naapertorlugu apriilip ulluisa arfernanni qinersisoqassaaq.
Ulloq taanna poorskip kingorna marlunngornerup – taamaalillunilu Inatsisartunut qinersineq aamma kommunimut ilagiinnullu qinersinissat imminnut apussapput.
Suliap naatsumik oqaluttuarinera
Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Taassuma Kim Kielsen taarserlugu novembarimi siulittaasunngorpoq.
Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.
Siumut iluani isumaqatigiinngittoqarpallaartoq taakku isumaqarput. Matumani Kuannersuarni aatsitassarsiornissamik suliniummut, aatsitassanik qaqutigoortunik uranitalimmillu piiaanissamik kissaateqartoqarneranut tapersersuineq annikilliartorpoq.
Inatsisartuni amerlanerussuteqartut maanna qinersinissamik suaaruteqartoqartikkusuppaat.
Naalakkersuisut siulittaasuat, Kim Kielsen nammineerluni tunuanngippat qinersisoqarnissaa partiit namminneq aallartissinnaavaat.
Partiimit Naalakkersuisunut Naalakkersuisulluunniit siulittaasuanut tatiginninnginnermik taasisoqarnissaanik siunnersuuteqartoqarneratigut taamaaliortoqarsinnaavoq.
Naalakkersuisut siulittaasuat tunuassaguni qinersisoqarnissaanik suaaruteqarsinnaasoq imaluunniit siulittaasuuffik Inatsisartuni ilaasortamut allamut ingerlateqqissinnaallugu.
Siulittaasoq nutaaq naalakkersuisunik nutaanik Inatsisartunit amerlanerussuteqartut tapersigaannik inissiissaaq.
Inatsisartunulli qinersineq allamik ullulerneqartariaqartoq, illuatungiliuttut partiianit Inuit Ataqatigiinni siulittaasup tulliata, Aqqaluaq B. Egedep Inatsisartuni oqaaseqartarfimmit oqaatigaa.
- Immikkoortut tamarmik ullormi ataatsimi qinersissutigineqannginnissaat pillugu oqaloqatigiittoqarnissaa kissaatigaarput, taanna oqarpoq, nangillunilu:
- Politikerit nuiumannginnerusut ataqqillugillu peqataatissavagut.
Taamaammat qinersinissamut ulluliinissaq Inatsisartut inatsisit pillugit ataatsimiititaliaanit oqallisigineqarnissaa partiip siunnersuutigaa.
Nunatta Qitornaanit, Aleqa Hammond aamma taama oqariartuuteqarpoq:
- Kommuninut qinersisoqarnissaanut qineqqusaarnerit Inatsisartunut qineqqusaarnernik qallerneqassaaq. Qineqqusaarnerit tukangaatsiassapput tamanna qinersisartunut peqqinnanngilaq. Qinersinerit avissaangatinneqartariaqarput, Inatsisartunullu qinersineq allamik ullulerneqartariaqarluni, Aleqa Hammond oqarpoq.
AAMMA ATUARUK Erik Jensen qinersineq pillugu: Politikkut pissutsit Siumup pingaartumik akisussaaffigai
Ukiukkut ataatsimiinnermi ullumikkut ulloq siulliuvoq, Naalakkersuisuni Siumullu iluani sapaatini akunnerni marlunni isumaqatigiinngittoqangaatsiareersorlu illuatungiliuttut partiivi, Inuit Ataqatigiit, Demokraatit, Partii Naleraq Atassullu ataatsimoorlutik nalunaaruteqarput: Taakku tusagassiuutinut naatsumik nalunaaruteqarnerminni partiit sisamaallutik Inatsisartunut qinersisoqarnissaanik suaaruteqartoqarnissaa kaammattuutigalugu paasissutissiissutigaat.
Inatsisartunut kingullermik 2018-imi upernaakkut qinersisoqarpoq.