Qujaukitsup Svanellu akisussaaffii ilaneqartut

Erik Jensenip naalakkersuisutut tassanngaannartumik tunuarnera pissutaalluni, naalakkersuisutut akisussaaffiit naalakkersuisut siulittaasuata Kim Kielsenip naalakkersuisunut ilaasortanut agguaappai.

Aatsitassanummi suliffeqarnermullu naalakkersuisutut akisussaaffiit naalakkersuisuni ilaasortanut allanut agguaanneqarput.

AAMMA ATUARUK Tusagassiuutit: Erik Jensen naalakkersuisuujunnaalerpoq

Aningaasaqarnermut nunanillu avannarlernik suleqateqarnermut naalakkersuisup Vittus Qujaukitsup, aatsitassanut ikummatissanullu naalakkersuisoqarfik aamma akisussaaffigilissavai, aningaasaqarnermut aatsitassanullu naalakkersuisunngussalluni.

Inuussutissarsiornermut, nukissiuuteqarnermut ilisimatusarnermullu naalakkersuisoq, Jess Svane, nutaamik aamma akisussaaffeqalissaaq, suliffeqarnermummi naalakkersuisoqarfik aamma akisussaaffigilissagamiuk.

AAMMA ATUARUK Labansen Erik Jensenip tunuarnera pillugu: Tupaallannanngilaq

Taamaattumik Jess Svane Inuussutissarsiornermut, Nukissiuuteqarnermut, Ilisimatusarnermut Suliffeqarnermullu naalakkersuisunngussaaq.

Erik Jensenip naalakkersuisutut tunuarneratigut naalakkersuisunut ilaasortat arfineq-marluinanngorput.