Qujaukitsup inuusuttut sulilersikkusuppai

Tunisassiorfiit sulisussaaleqisut tusarajupparput. Tamannali ilutigalugu suliffissaaleqisutut nalunaarsorsimasut suli amerlasut naatsorsuinermi takuneqarsinnaavoq.
Assi © : Naalakkersuisut
Allattoq Karsten Sommer
juulip 25-at 2018 13:06

Tamatuma imminut akerleriinnera suliffeqarnermut naalakkersuisup, Vittus Qujaukitsup iliuuseqarfiginialerpaa.

Taassuma suliffissarsiuisarfiit siunnersuisarfiillu Majoriaq, kommunini borgmesterit kiisalu sulilersitsinissamut ilinniaqqinnissamullu suliaqartut allat aasaanerani oqaloqatigiartaarpai.

- Inuusuttuaqqanik siunnerfiusunik sammisassaqartitsiniarluni suliniuteqarnerit Suliffeqarnermut Naalakkersuisutut suliniuteqarfissani pingaarnertaatut isigaakka, Vittus Qujaukitsoq tusagassiuutinut allappoq.

Inuusuttummi taakkua nunatsinni nukissatta pingaaruteqarluinnartut ilagaat, ataatsimoorlutalu taakkua suliniuteqarfigissavagut ingerlaqqinnissaanik, Vittus Qujaukitsoq nangilluni oqarpoq.

Inuusuttut 750-it missaanniittut meeqqat atuarfianni ukiut tamaasa naammassisarput. Taakkunanngali 14 procentiinnat ilinniarnertuunngorniarfinnut inuussutissarsiutinulluunniit ilinniarfinnut ingerlaqqittartut, Kisitsisit nutaanerusut 2016-imeersut takutippaat.

Naammassisut 38 procentii efterskolertarput, 14 procentit sulilertarput. Sinneruttullu 34 procentit sulinatillu ilinniaqqittanngillat.

Vittus Qujaukitsup Sisimiuni Aasiannilu ataatsimiinnermini ukiup ilaani unammillernartut, sulisunut nutaanut inissaqartitsinnginnermi isumaginninnikkullu unammilligassat ilaatigut tusarfigai.

AAMMA ATUARUK Aasaanerani sulisussaaleqisoqarmat sulisut sulipiloorput

- Siunitsinniipput inuiaqatigiinni ajornartorsiutit ataatsimoortut, suliassaqarfiit suliffeqarnermi, kommunini, Naalakkersuisoqarfinni aammalu sulisoqarnikkut kattuffinni suleqatigiinnitsigut aaqqiissutissarsiuuttariaqakkagut, Vittus Qujaukitsoq erseqqissaavoq, taassuma ajornartorsiutit pineqartut pillugit isumasioqatigiissitsinissaq pilersaarusiuleruttorpaa.

AAMMA ATUARUK Suliffissaaleqisut suli ikiliartortut