Qujaukitsoq Naalakkersuisut isumasioqqaarnagit iliuuseqartoq
Taassuma Danmarkimi sulisoqarnermut minitseri, Henrik Dam Kristensen, ataatsimeeqatigisimavaa, angerlaassinissamilu aningaasaqarnikkut kingunerusinnaasut misissorneqaleruttorput.
Danskit naalakkersuisuinut attaveqarnermi Vittus Qujaukitsoq kisermaassivoq. Naalakkersuisoqataasullu isumasiorneqaratik.
- Tassa qallunaat naalakkersuisoqatigut naapikkaagatsigit oqaloqatigiissutigisagut assigiinngitsorpaaluusarput, taamaammat naatorsuutigilluinnarpara innuussutissarsiornermut naalakkersuisup naalakkersuisut tamarmiusut ilisimatikkumaarai qanoq pisoqarsimanersoq imaluunniit suna oqaluuserineqarsimanersoq, Aningaasaqarnermut naalakkersuisuisoq, Andreas Uldum oqarpoq.
Aatsitassarsiornissaq qitiusoq
Qujaukitsup danskillu sulisoqarnermut ministeriata suliassaqarfimmik angerlaassinissamut suliaqaneranut atatillugu allaffigeqatigiittarsimaneri, KNR-ip allagaatinik takunnikkumanikkut pissarsiareqqammerpai, uranimillu piiaanermi qinngualanernut ulorianartunut isumannaallisaanermut aammalu sullivinni atukkatigut maleruagassat pillugit Nunarput nammineerluni maleruagassiornissamut suliniuteqartoqartussanngorlugu oqallisigineqarpoq.
Vittus Qujaukitsup danskit sulisoqarnermut ministeriat, Henrik Dam Kristensen januaarip naalernerani attaveqarfigaa, februarillu sisamaani naapinnerminni Qujaukitsup anguniakkani Naalakkersuisut kissaataattut saqqummiupaa.
Suliffeqarfinni isumannaallisaanermut tunngasunik Nunatta tigusinissamik kissaataa siusinnerusukkut oqallisaasareernikuuvoq, uranimulli naaggaarluinnarneq atorunnaarnersinneqarmat tamanna nukingernerulersutut isikkoqalerpoq.
Tassalu piginnaasanik akisussaaffinnillu, naalakkersuisut allat susassaqarfiinut kalluaasunik oqaluuserisanillu akersuussutaasinnaasunik, soorlu uranimut tunngasunik, Nunatta tigusinissaa pineqarpoq. Taamaakkaluartoq Vittus Qujaukitsup qaammatini sisamani suliamik matuminnga suliaqarnermini Naalakkersuisoqatini oqaloqatigisimanngilai.
Kisianni Vittus Qujaukitsup malittarisassat malillugit ingerlalluni oqaatigaa. Taassuma maannamuugallartoq suliat tassaaginnarnerarpai qulaajaanerit.
- Pitsaaqutaasut, ajoqutaasut, aningaasatigut qanoq annertutigisumik sunniuteqassanersut sulisoqarnikkut qanoq sunniuteqassanersut aatsaa tmassakkut nassuiaasiorlugit atorfilittanit ingerlanneqarput.
Vittus Qujaukitsoq oqarpoq.
Aatsitassanut naalakkersuisoq, Andreas Uldum naalakkersuisoqatinilu allat malinnaatinneqanngillat, eqqumiigaalu qaammatit sisamat suliap ingerlanerani suleqatiminit tusarsimannginnami.
Andreas Uldumip taamammat tupaallalaarsimanini isertuanngilaa.
- Tusagaq uannut nutaajuvoq, taamaammat naalakkersuisoq suleqatiga saaffigissuara aperalugulu qanoq ingerlasoqarsimanersoq sumullu tunngassuteqarnersoq paasiniaaffigalugu.
Aningaasaqarnermut naalakkersuisoq, Andreas Uldum naggasiivoq.
