Qujaukitsoq Tunngavisumik inatsisissamik suliaqarnerup tunngavissaanik suliaqarpoq
Tunngaviusumik Inatsisissaq pillugu Isumalioqatigiititap siumut isigalugu sulinissaa, nunamut namminermut naalakkersuisup Vittus Qujaukitsup maanna nalilersorpaa.
Naalakkersuisut tusagassiuutinut nalunaarummi ullumi ullaap tungaani taama ilaatigut allaaserisaqarput.
Isumalioqatigiititap maannamut sulinerata naammaginartuusimannginnera Vittus Qujaukitsup nassuerutigaa:
- Tunngaviusumik Inatsisissaq pillugu Isumalioqatigiissitap siuliani sulisimanerata uteqqinnginissaa sapinngisamik anguniarpara. Taamaattumik Inatsisartuni Naalakkersuisunilu partiit oqaloqatiginerannit suliassap tunngavia misissoqqinneqarpoq.
Vittus Qujaukitsoq tusagassiuutinut ilaatigut taama allappoq.
AAMMA ATUARUK Tunngaviusumik inatsisissaq pillugu suliaq uninngaqqippoq
Isumalioqatigiititap katitigaanera taavalu aamma suut suliassarpiaanersut ersarissumik allassimasariaqarnersut ilanngutissagai nalilersorneqassapput.
Nunatsinni tunngaviusumik inatsisissamik suliaqarluni sulineq aammaarluni uninngasoq - tamatumuuna Inatsisartunut qinersinermik peqquteqartumik - sapaatit akunnerata kingulliup naajartornerani tutsiunnerata malitsigisaanik, naalakkersuisoq nalunaarpoq.
Illuatungiliuttut partiivisa IA-p aamma Demokraatit isumalioqatigiititap sulinermini tunngaviata allanngortinneqarnissaa sapaatit akuneranni kingullermi ujartorpaat. Tassalu tamanna Vittus Qujaukitsup suliarilerpaa:
Qujaukitsoq KNR-imut allakkatigut akissuteqarluni allappoq:
- Siunertaavoq isumalioqatigiititap suliakkiissutinut najoqqutassiaa qanoq allannguuteqartigissanersoq eqqartorneqarnissaa, naatsorsuutigaaralu naliliinerup inernera juulip naannginnerani pigilersimassallugit.
AAMMA ATUARUK Tunngaviusumik inatsisiliorniarneq aallaqqaataaniik
Isumalioqatigiititap 2019-ip kingorna sulinissaanut aningaasanik maannamut immikkoortitsisoqanngilaq.
Tamatumunnga Vittus Qujaukitsoq allappoq, Tunngavisumik inatsisissaq pillugu isumalioqatigiititap sulinerata sivitsorneqarnissaanik qinnuteqarsimalluni.
Tamannalu Inatsisartut aappaagumut aningaasanut inatsimmik isumaqatigiinniarnerminni ilanngullugu isumaqatigiinniutigisassarissavaat.
