Royal Greenland raajat pillugit: - Quarsaarujussuanngilagut
Raajarniat umiarsuaatileqatigiiffiillu 2025-mut raajartassiinikinnerungaatsiartoqarataannaanera siooqqatigaat.
Raajaqassusermi annikilleriarsimasoq, uumassusilerisut Pinngortitaleriffimmeersut kisitsisaataasa kingulliit takutippaat. Taamaammat 2025-mut 22.500 tonsinik raajartassiinikinnerusoqassasoq siunnersuutigaat.
Taamaaliortoqassappat tamanna isertitakinnerunermik akissaatikinnerunermillu kinguneqartussaassasoq, Sulisitsisut oqaatigaat.
Aamma raajanut akitsuutinit 50 millionit koruuninik nunatta karsianut annaasaqaataassangatinneqartoq, aningaasaqarnermut naalakkersuisoqarfimmit oqaatigaat. Tamatumalu saniatigut nunatta karsia inuit ingerlatseqatigiiffiillu akileraarutaanniit qassiugaluarnersunik isertitakinnerulissangatinneqarmat, nunatsinni inuiaqatigiit aamma eqqorneqaatigisussaassavaat.
Royal Greenlandili annilaanganngilaq.
Tassa uumassusilerisut pisassatut siunnersuutaat malillugit aappaagumut katillugit 22.500 tonsinik ikinnerusunik raajartassiisoqassagaluarpalluunniit annilaanganngilaq.
Royal Greenlandip tunisassiornermut pisortaa Lars Nielsen taama oqarpoq.
- Raajaqassutsip qaffariaateqartarnera appariaateqartarneralu uagutsinnut tusarnartaanngilaq. Taamaammat quarsaarujussuaqqajanngilagut. 2024-mimi pisassatut raajartarinngitsuukkavut 2025-m pisassanut nooriaannaagatsigit sunnerneqaatiginavianngilarput.
Ukiumut pisassatut pisarinngitsuukkaminnik ukiup tullianut nuusseriaannaasaramik 2024-minngarnit 2025-mut raajartassiinikinnerungaatsiartoqarataannaanera umiarsuaatileqatigiiffitsik sunnerneqaatingaarnavianngikkaa, Lars Nielsenip erseqqissaatigaa.
- Uumassusilerisut raajartassatut siunnersuutaat 80.000 tonsiunersut 92.000 tonsiunersulluunniit 2025-mi qanoq raajarniarsinnaatiginissatsinnut apeqqutaanavianngilaq.
Saarulleqarluarnera annassutigigaat
Raajassutsip appariaateqarneranik pissuteqartumik uumassusilerisut pisassatut inngersuussutaaninngarnit 2016-imitulli raajartassiinikinnerungaatsiartoqassagaluarpalluunniit, saarulleqarluarmammi Royal Greenlandip tamanna annaasaqaatigingaarnavianngikkini naatsorsuutigaa.
Raajaqassusermi appariaateqaraluartoq, saarulleqassuseq killuanik qaffariaateqarpoq.
- Raajassutsip appariaateqarnerani annaasassaraluavut taarsiutissaqassangatippavut. Kalaallit Nunaannimi saarulleqassutsip qaffariaateqarnera isumalluarfigaarput, Lars Nielsen oqarpoq.
2024-mi sipaaruteqarlusi, sulisukillisaasusi nutaamillu inerisaasusi, siulersuisussi siulittaasuata ukiumoortumik naatsorsuutissinni kingullerni oqaatigaa. Uumassusilerisut pisassatut siunnersuutaat malillugit raajartassiisoqassappat, tamanna soraarsitsiortuisariaqarnissasssinnik kinguneqassava?
- Apeqqutivit akinissaa siusippallaaluatsiarpoq. Raajartassiinikinerusoqassappat, imaanngilaq taamaaliortoqarmat taava naleqqussaalertariaqassasugut. Tassa aalisarnerup silarsuaa taamaappoq, pisassiinerusoqariataanngikkunimi pisassiinikinnerusoqariataartarpoq, Lars Nielsen oqarpoq.
Naalakkersuisullu suleqatigiilluarpugut
Raajallu aarlerinartorsiortitaaleqqunagit raajarniarnerlu inuussutissarsiutaaginnarsinnaaqqullugu raajartassiissutigineqartartut uumassusilerisut pisassatut siunnersuutaannut sapinngisamik naapertuuttarnissaat pingaartutut Royal Greenlandip isigaa.
- Uumassusilerisut aappaagumut raajartassiissutissatut siunnersuutigilersaagaaninngarnit annkinneroqisunik pisassinneqarneq misigisareerparput. Pisassallu annertussusaasa nikerartarnerannut naleqqussartarpugut. Raajanullu; aamma ukiut qulit, 20-t 50-illumi qaangiuppata, aarlerinartorsiortitsinngitsumik, raajarniartoqartarnissaa uumassusilerisullu pisassatut siunnersuutaat malillugit raajartassiisoqartarnissaa tapersersorluinnarparput.
- Kalaallit Nunaanni aalisarnermik inuussutissarsiutillit tamarmik naalakkersuisunut inassuteqaraangata malinneqarnissaat ileqqutoqaavoq. Aalisarnermillu inuussutissarsiutillit tamarmik malittarisassanik aalisarfinnut MSC-mik allagartaliinermut tunngasunik minnerpaatut naammassinneqqussagaatigut naatsorsuutigaarput, tassa TAC-p 12,5 procentinik apparneqarnissaa.
Rusland niueqatigiumaneeruttoq
Royal Greenland russit aalisakkanik tunisassiaannik USA-mut Europamullu eqqussuilluartuunikuuvoq.
Nunartilli russit saarullinnik tunisassiaannik eqqussuiviujunnaassasoq, USA 2022-mi aaajangerpoq, taamaakkaluartoq kinamiut umiarsuaasa russit saarullinnik tunisassiaannik USA-mi niuffafiusunut eqqussuiinnarnerannik kinguneqartumik russit umiarsuaat Kinap umiarsualiviinut talissaanngillat.
Nunartilli tassa russit saarullinnik tunisassiaannik eqqussuiviujunnaavissasoq, USA-p naalakkersuisui ukioq manna aalajangerput. EU-mi assingusumik iliortoqassanersoq, Europa Kommissionimi oqallisigileruttorpaat.
Tamannalu Royal Greenlandip siunissaanut tunngatillugu sunniuteqarluartoq, Lars Nielsen oqarpoq.
- Saarulliit akii Amerika Avannarlermi Europami pitsanngoriaateqartut malugusuutigeqaarput. Tamanna ilaatigut Barentip imartaani aalisarnerup ingerlanerliorneranik aamma Amerika Avannarliup Europallu russit saarullinnik tunisassiaannik eqqussuiviujunnaarnerannik pissuteqarpoq.