Polititikkut naliliisartoq: Qinikkat taasinernik annaasaqarnissartik ernumatigaat
- Imarisamigut imaannaangitsunik piviusunik oqariartuuteqarmat, oqaluuserissallugit paquminarsinnaasumik immaqalu aamma taasinernik akeqarsinnaasumik, Naja Paulsen taama oqarpoq.
Taamaammat nuna tamakkerlugu pilersaarutip ukiaanerani oqaluuserineqarnissamit peerneqarpat, nunaqarfiit matuneqarnissaat pillugu oqalliseqataasariaqanngillat. Politikkikkummi navianartuugami.
Nuna tamakkerlugu pilersaarusiaq ukiaanerani oqaluuserineqartussaagaluartoq, Naalakkersuisunit marlunngornermi peerneqarpoq. Naalakkersuisut pilersaarusiaq septembarimi pisimavaat, aatsaallu piffissaq kingulleq atorlugu peeqquneqarluni.
Qinikkat nuna tamakkerlugu pilersaarusiaq ukiaanerani ataatsimiinnermi oqallisigissallugu piareersimaffiginngikkaat, Naja Paulsen oqarpoq, kommuninummi qinersinissaq qanilliartorpoq, qinersisinillu annaasaqarnissartik ernummatigalugu.
- Naliliinera naapertorlugu, tunuartinneqarnera, imatut paasisariaqarpoq, qinikkat piareersimanngillat tulleriiaarineq pisariaqartoq innuttaasunut pingaartumillu nunaqarfimmiuni, sukumiinerusumik oqallissigissallugu, Naja Paulsen taama oqarpoq.
Aamma atuaruk Naalakkersuisut pilersaarusiaq oqallisigerusunngilaat
Nuna tamakkerlugu pilersaarusiaq politikkikkut navianarsinnaasunik saqqummiussivoq, kisiannili imarisai pissutigalugit peerneqarnera Naja Paulsenip ilimaginngilaa.
- Eqqoriarsinnaavara oqaluuserisassap imarisai annertuut, inuiaqatigiit tulluaasussaammata, kommunimullu qinersinissaq 2017-mi pisussaq qanilliartuaarmat, taamaattumik allatut ajornartumik tunuartiinnarsimassagaat, Naja Paulsen taama oqarpoq.
