Qinigassanngortittut suliniutigisassatik saqqummiuppaat

IA qinigassanngortitai assigiinngeqisut tallimat suninguna pingaarnerutitaqarniarpat?

Siullermik ICC-mi inuit pisinnaatitaaffiinik ataqatigiissaarisoq Sara Olsvig ima oqarpoq:

- Folketingimi sulissutigerusutakka annerpaat tassaapput Namminersorneq pillugu inatsisip atuutsilernissaa, oqartussaaffillu tigoorarnerini isumaqatigiissutit pitsaanerpaat anguniarnissaat.

Taava Johan Lund Olsen IA-mi aamma Inatsisartuni siulittaasuusimasoq:

- Folketingimi pingaarnertut suliniutigisassarput tassaavoq kiffaanngissusitta annertusartuarnissaa, namminersorneq 2009-mi inuiattut ullorsiornitsinni eqqunneqartoq isumaqatigiinniaqataaffiginikuuara, taamani kiffaanngissuseq ilivitsoq angerlaatinngilarput aamma naammassinngilarput. Taamani angusarput annerpaaq assaavoq aatsitassanik tamakkiisumik iluaquteqarsinnaanngornerput.

Sofia Rossenip, folketingimi sulinermik misilittagaqareersup CIA-p tigusanik angallassisarsimaneragaanera suliassatut pingaarutilittut isigaa:

- Folketingimi suliassat ingerlaqqinnissaat pisariaqarpoq, Atlantikup avannaani suleqatigiinnerup ingerlateqqinnissaa aamma nunanit allaniit nunarput aqqusaarlugu timmisartunik miffigineqartarnerit pimoorullugit misissorneqartariaqarput.

Nikoline Ziemerip siusinnerusukkut partiiliornermik misilittagaqartup, IA sinnerlugu qinigassanngortinnermini pingaarnerutitassani ima oqaatigai:

-  Ilaatigut sulissutigerusuppara eqqartuussiveqarneq pillugu isumalioqatigiissitap nalunaarusiaata piviusunngortinneqarnissa. Tassami matoqqasumik parnaarussiviliornissamik pilersaarutaagaluartoq uninngatiinnarneqarpoq, tamannalu akuerineqarsinnaanngilaq, Nikoline Ziemer oqarpoq.

Taavalu Kaali Olsen Inatsisartuni sinniisutut misilittagaqartoq maanna Danmarkimi inatsisiliortuni aamma misilittagaqarusulerpoq:

- Folketingimi sulissutiginiakkakka pingaarnerit tassaapput nunatta soqutigisai, soorlu nunanut allanut sillimaniarnissamullu politikki ukiuni aggersuni pingaartorujussuusussaavoq.

IA-p folketingimut qinigassanngortitaasa pingaarutitaat tamakkuupput, taamaattorli IA folketingimi ilaasortaatitariligassani - ataaseq marlulluunniit - sumut atorniarpai. Siulittaasoq Kuupik Kleist ima oqarpoq:

- Soorunami folketingimi nunarput sinnerlugu akisussaaffigineqartut arlalialussuupput, aamma folketingimi ilaasortaaneq inunnut amerlanerusunut appakaannissamut periarfissiivoq, tassanilu suliassaq pingaarnerpaaq tassaavoq nunatsinni pissutsinik paasititsiniaaneq aamma paasineqarnissamik suliniuteqarneq.