Qinigassanngortittut Folketingimut ilisimasaannik apersorneqartut.

Folketingimut qineqqusaarneq 2015 Qinigassanngortittut Folketingimut ilisimasaat killeqartut

Qinigassanngortittut Folketingimut ilisimasaannik Nuummi Ilimmarfimmi ippassaq apersorneqarput. Suliassaqarfiit Namminersorluni Oqartussanit suli tiguneqanngitsut minnerpaamik qulit suunersut taasinnaaneraat apeqqutigineqarmat tamanit eqqorneqanngillat.

Folketingimut qinigassanngortittut Nuummi Ilimmarfimmi ippassaq oqallitsinneqaramik kiagutsinneqangaatsiarput. 

Oqallitsitsinermut aqutsisup apeqqutit folketingimut tunngasut pingasut qinigassanngortittunut apeqqutigisai, qinigassanngortittut akiuminaatseqaat.

Danskit folketingianni ilaasortat qassiuppat? Qallunaat partiivi qassit folketingimut qinigassanngortippat? Suliassaqarfiit nunatta suli tingusimanngisaat minnerpaamik qulit taakkit.

Qinigassanngortittut ataasiakkaarlugit nalorsitsaarlugit taama aperineqarput, aperineqanngitsut siutequteqarlutik nipilersuummik tusarnaartinneqarlutik, taamaasillutik partiit allat akissutaat paasinnginnerussammassuk.

Aamma atuaruk Ili Ili qinigassanngortittunut Ilimmarfimmi oqallitsitsilerpoq

Taamannak nalorsitsaarineq qinigassanngortittunut qungujulatitsivoq, qinigassanngortittulli ilaanut apeqqutigineqartut kiagunnaqaat.

Amerlanerimmi eqqortumik akinissartik ajornakusoortippaat, ingammik apeqqut suliassaqarfinnut tunngasoq pineqartillugu. 

Ilinniartut peqatigiiffiata oqallitsitsinermullu aqqissuisuup Ili Ili-p siulittaasuata Vivi Voldip tamanna tupaallaatigaa.

- Annertunerusinnaavoq uani ilisimasaat, naliginnaasut folketingimut isissagaanni nalunnginneqartussaagamik Vivi Vold oqarpoq.

Nalorsitsaarinikkut qinersisussaasugut qinigassanngortittunut minnerpaaffeqartumik piumasaqaateqarnerput aaqqissuisut takutinniarpaat.

Aamma atuaruk Politikerit Skaalemut: Folketingi pisariaqarpoq

Folketingimut akisussaaffeqarfioqisumut aallartitassatta ilisimariigassaat annikippallaartut Ili Ili isumaqarpoq.

- Paasitinniarlugu suliassarujussuusoq aamma akisussaaffik annertoorujussuusoq.

Inuit Ataqatigiit siulittaasuat folketingimilu ilaasortaasimasoq Sara Olsvig oqallitsitsinermut tusarnaariarpoq, taassumalu  oqartussaaffiit pillugit akissutigineqartut immikkut maluginiarpai.

- Soorunami amerlanerusunik taasaqarsinnaasariaqarpugut, Sara Olsvig oqarpoq. Taassuma qinigassanngortittut ilaasa ilisimasakittarnerat ilisimaarereerpaa. Suliassaqarfiilli Namminersorluni Oqartussanit suli tiguneqanngitsut ilisimalluarnissaat pingaaruteqartoq taanna isumaqarpoq.

- Soorunami folketingimut ilaasortanngussallutik sassartut tamakkua ilisimanerusariaqarpaat.

Sara Olsvigilli naqissuserpaa Folketingimut maannamut qinigaasimasut ilisimasakissimanngitsut.

Taamaakkaluartorli nalorsitsaarinerup inernera allanngunngilaq, Vivi Voldillu isumani attappaa:

- Tassani ilisimasaqarneq imaluunniit ilisimasaq annertunerusinnaanera takutippaa, Vivi Vold oqarpoq.

Ilimmarfimmi ippassaq qineqqusaarneq KNR radiokkut sapaatiuppat ataatsip qeqqa aallakaatinneqarpat, qanoq ingerlasimanera illit nammineq nalilersinnaavat.

 

 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat