Qinigassanngortittup akiliutit appartikkusuppai

Kujataanimi A/S Inissiaatileqatigiiffik INI-ip attartorisimasaanit - tassunga init paarinerlunneqarsimanerinut akiligassat ilanngullugit - 27,3 million koruunit akiitsorineqarput:

- Tassa tunngavigivaa maannakkorpiaq Nunatsinni inupparparujussuaqarmat akiliisinnaajunnaarsimasunik - akit qaffappallaarnerujussui pissutigalugit. Aammalu annertuumik anisitaanermik kinguneqarlutik. Isumaqarama uanga tamatta pisussaaffigigipput taama inississimagutta, taava nutaamik eqqarsarnikkut nutaanik inatsisitigut periarfissanik ujarlernikkut aaqqittariaqarigut, Ole Mølgaard-Motzfeldt, Siumut tunuliaqutaralugu Inatsisartuntu qinigassanngortittoq taama oqarpoq. Taassumali ersarissumik oqaatigisinnaanngilaa, ineqarnermut akiliutit appartinnissaannut qanoq iliuuseqartoqarsinnaanera:

- Maannakkut oqaatigisinnaanngilara suliaq misissorneqartariaqarmat. Maannakkorpiaq oqaatigisinnaanngilara landskarsi aningaasatigut qanorpiaq inissisimanersoq - nalunngikkaluarparput aningaasaateqanngitsoq. Taamaattumik aatsitassarsiorneq eqqarsaatigalugu, aatsitassarsiornikkut aningaasat isertitagut arlaatigut atorluarlugit iliuuseqartariaqarpugut, Ole Mølgaard-Motfeldt oqarpoq. Taassuma ineqarnermut tapiissutit inunnik isumaginninnermilu ineqarnermut ikiorsiissutaasartut ullumikkut tunniunneqartartut naammattutut isiginngilai:

- Taakkua naammanngillat. Aamma ullut tamaaviisa sulinitsinni tamanna takusarparput. Taamaammat pinngitsooratik taakkua iluarsisariaqarput piaarnerpaamik, Ole Mølgaard-Motzfeldt oqarpoq.

Ineqarnermut Naalakkersuisuungallartulli inissiat aserfallatsaalinissaannut siunissamut ileqqaartariaqartugut oqarpoq:

- Isumaga naapertorlugu pingaarnersaavoq innuttaasut pitsaasunik peqqinnartunillu inissaqartinnissaat siunissami. Taamaammat kukkunersuaq uteqqissanngilarput. Aningaasat aserfallatsaalinissamut naammattariaqarput, taamaalinikkut inissiaatigut siunissami paarilluarsinnaavagut, Jens B. Frederiksen oqarpoq, nangillunilu:

- Naalakkersuisuni periusissamik saqqummiinikuuvugut. Tassani aaqqiivigineqartussaavoq aamma suliarineqarpoq boligsikringimut tunngasoq. Taamaaliornikkut pissakilliortut immaqaluunniit akissaqarpallaanngitsut isumagineqartussaapput, Jens B. Frederiksen oqarpoq. Taassuma aatsitassarsiornermi isertitarineqartussat aningaasaateqarfimmut ileqqaarneqarnissaat Inatsisartuni partiit tamarmik akuersissutigisimagaat ilanngullugu erseqqissaatigaa:

- Taakkua Inatsisartuni Råstoffond-imut nakkartussaassasut aalajangereernikuuarput. Taamaammat imaanngilaq aningaasat taakkua ingerlaannaq atuinnarsinnaagigut. Patajaatsumik eqqarsarluaqqaarlutalu taakkua atortussaavagut.

INI-mut Nunatsinni tamarmi attartortut ullumikkut 85 million koruuninik akiitsoqarput. Taakkunannga ilaapput inissianut paarinerlunneqarsimasunut iluarsartuussinermut aningaasartuutaasimasut.