Qinigasartut allattorsimaffiat akuerineqartoq: Qinigassanngortittut takukkit

Politikerit 213-it qinigassanngortipput. Nuimasut qingiassanngortittunut ilaasut - ilaat aamma amigaataapput.

Allattoq Hanna Vestergaard Hviid

februaarip 19-at 2025 10:47

Nutserisoq Connie Fontain

Qinersinermut Ataatsimiititaliap Inatsisartunut marsip 11-ianni qinersinissamut qinigassanngortittut ullaaq manna akuerai.

Partiit Atassut, Demokraatit, Inuit Ataqatigiit, Naleraq, Siumut aamma Qulleq tamarmik qinigassanngortitaqarput.

Politikerit 213-it katillugit qinigassanngortipput.

Qinigassanngortittut ima amerlatigipput

Atassut 20-nik qinigassanngortitaqarpoq. Inatsisartunut marlunnik maanna qinigaatitaqarpoq.

Demokraatit 25-nik qinigassanngortitaqarput. Taakku Inatsisartunut pingasunik maanna qinigaatitaqarput.

IA 39-nik qinigassanngortitaqarpoq. Inatsisartunut aqqanilinnik maanna qinigaatitaqarpoq.

Naleraq 62-nik qinigassanngortitaqarpoq. Inatsisartunut sisamanik maanna qinigaatitaqarput.

Qulleq 16-inik qinigassanngortitaqarpoq. Aatsaat siullerpaamik qinigassanngortitaqarpoq, taamaalilluni INatsisartunut qinigaatitaqarani.

Siumut 51-inik qinigassanngortitaqarpoq. Inatsisartunut qulinik maanna qinigaatitaqarput.

Allisiguk

Kommunalbestyrelsimut ilaasortarpassuit allattorsimaffimmi nassaassaapput. Matumani Kommune Kujallermi borgmesteri, Stine Egede (IA) aamma Kommune Qeqertalimmi borgmesteri, Ane Hansen (IA). Kommuneqarfik Sermersuumi borgmesterip tullersortaa, Justus Hansen (D) aamma qinigassanngortippoq.

Folketingimut ilaasortaq Naleqqameersoq, Aki-Matilda Høegh-Dam aamma qinigassanngortippoq, KNAPK-llu siulittaasua, Nikkulaat Jeremiassen Siumumit qinigassanngortilluni.

Kikkut qinigassanngortinnginnersut immaqa maluginiagassaaneruvoq. Nunalerinermut, Imminut Pilersornermut, Nukissiuutinut Avatangiisinullu Naalakkersuisoq Kalistat Lund (IA) qinigassanngortittuni allassimanngilaq.

Inatsisartunut ilaasortaq, Eqaluk Høegh Inuit Ataqatigiinneersoq aamma ilaanngilaq.

Allattorsimaffik tamakkiisoq uani takuneqarsinnaavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.