Qinigaanerup Misilinneqarnissaanut Ataatsimiititaliaq misissugaqarsimavoq
Ataatsimiititaliaq utaqqiisaagallartuinnaavoq ilaasortanngortullu qinigaasinnaatitaanersut pillugit Inatsisartunut nalunaarusiornissaq kisiat suliassaralugu. Inatsisartunut ilaasortaq ukiut tallimat iluanni pineqaatissinneqarsimappat, ilaasortaq taanna Inatsisartunut qinigaasinnaatitaassanngilaq, tamatumalu kingunerisaanik sinniisussamik taarserneqartussaassalluni.
- Suliassanik innersuussisoqartarpoq, suliallu ullaap tungaani naammassivagut. Nalunaarusiorpugut taannalu Inatsisartunut ingerlateqqipparput. Inatsisartut maanna suliassalerilerpaat ilaasortallu naliliiffigisussanngorlugit. Uagut suliassarput naammassivarput, suliavullu oqaaseqarfigeqqissanngilakka, Lars Emil Johansen KNR-imut oqarpoq.
Inatsisartunngortut tallimanngornermi apriilip tallimaani ataatsimeeqqaartussaapput, tamatumalu kingorna sulianik naliliiffigisassaqarsimappat taakku aalajangiiffigineqassallutik, aamma ataatsimiititalianut ataavartunut ilaasortanik toqqaasoqassaaq. Naalakkersuisunut siulittaasunngortussaq Aleqa Hammond Qinigaanerup Misilinneqarnissaanut Ataatsimiititaliaagallartumit suliat pillugit ilisimatinneqareerpoq, naalakkersuisussanillu qinigaasinnaanngitsunik toqqaannginnissaa anguniarlugu taamaaliortoqarpoq. Naalakkersuisunngortut tusagassiortunik aqagu ualikkut nalunaaqutaq pingasunut katersortitsinermi ilisaritinneqarnissaat naatsorsuutigineqarpoq
