Qinersisartut qiimallutik qinersiartukaapput

KNR ullaap tungaani Nuummi kulturikkut illorsuarmi Katuami, illoqarfiit pingaarnersaanni ukiormanna qinersivittut atorneqartumi, najuuppoq.

Inuppassuit qiimasut ullormik nuannaffittut isiginnittut naapippagut.

KNR-ip ilaatigut Sara aamma Mette qinersiartortut naapippai.

Nunatsinni qinersinerup nunarsuup sinneranut sooq taama pingaaruteqartiginersoq Sarap paasiuminaatsippaa.

- Qineqqusaarneq malinnaaffigerpiarsimanagu nassuerutigissavara, immaqa taamaaliorsimasariaqaraluarpunga, kisi9anni nunarsuup sinneranut qanoq pingaaruteqartiginersoq naluara.

Ikinngutaata Mettep sulisartut allamiut tikikkumaartussat peqqutaasinnaanasorai.

- Maanga suliartortussat, soorlu ass. kinamiut eqqarsaatigalugit, qinersineq aalajangiisuusussatut isigaara.

Aammattaaq qinersineq nuannaffittut pisussaaffittullu isigaa.

- Qinersinissaq pisussaaffittut isigaara, taamaaliornikkummi kikkut nunatsinnik aqutsisussanersout aalajangeeqataaffigineqassammat. Ullo0q nuannaffittut aamma isigaara, assullu nuannerpoq, Mette illalaarluni oqarpoq.

Joelip 79-inik ukioqartup qinersinerup inernissaa pissanngatigisupilussuuaa unnullu pissanganarluinnartussatut aammalu naligiittoqarnissaa ilimagalugu. Qinersinissani pingaartittupilussuuaa. Oqarpoq politikkikkut malinnaajuaannarsimalluni aammalu Kalaallit Nunaata siunnerfiata allanngortinneqarsimanera nuannaarutigalugu.

- Pingaaruteqaqaaq. Qinersinerit annersarigunarpaat aammalu nuannaarutissaalluarluni, Joel oqarpoq.

Aamma Arnep qinersiartortup Siumup IA-lluunniit taaguunneqarpaanissaa pissanngatigisupilussuuaa, aamma kikkut suleqatigiilerumaarnersut pissanngatigaa.

- Qinersinerit tamaasa qinerseqataaffigaakka, siunissaq pitsaanerusoq angujumallugu, pingaartumik meeqqat utoqqaallu eqqarsaatigalugit.