Qinersisartut ataatsimiinnerat KNR-ikkuussaaq
Siumut, Inuit Ataqatigiit, Demokraatit aamma Atassut aaqqissuisoralugit qinersisartunik ataatsimiisitsisoqassaaq Nuummi GUp timersortarfeeraani marlunngornermi septemberip 13-iat. Qinersisartunik ataatsimiisitsineq KNR-radiomi aallakaatinneqassaaq unnukkut nalunaaqutaq arfineq marluniit qulit tungaanut.
Toqqaannartumik taamatut aallaatitsisoqartussanngormat qinersineq pillugu KNRip aallakaatitassai allannguuteqalaarput. Pilersaarutaaqqaarsimagaluarpoq partiit siuttui oqallitsinneqassasut septemberip 13-at. Tamanna pingasunngorneq septemberip 14-at pisussanngorpoq siullermik kalaallisut nalunaaqutaq 19.15 kiisalu qallunaatut nalunaaqutaq 20.05.
Partiit assigiinngitsut qineqqusaartitaat oqalliseqatigiissapput KNRip aallakaatitsiviani. Tamanna pissaaq ataasinngorneq septemberip aqqaneq aappaat kalaallisut nalunaaqutaq 19.15 qallunaatullu nalunaaqutaq 20.05. Aallakaatitsinerni taakkunani partiit tamarmik marlunnik sinniisoqartassapput.
Malinnaasunit aamma qineqqusaarneq oqallissutigineqassaaq Sermitsiami akisussaalluni aaqqissuisoq Poul Krarup, cand. polit. Jakob Janussen, tusagassiornermut institutimi pisortaq Naja Paulsen aamma siornatigut AG-mi aaqqissuisoq Inga Dora Gudmundsdottír Markussen qinersinissaq pillugu oqallisilerpata.
Siumup qineqqusaarutini saqqummiutissavai unnugu nalunaaqutaq 19.15 aamma 20.05. Qinersineq pillugu aallaatinneqareersut KNRip nittartagaani maanna isiginnaarneqarsinnaalereerput.
