Qinersinerup kingorna kikkut pinnguaqatigeerusuppat?

Inuit Ataqatigiit Siumukkullu kisimiillutik Naalakkersuisunngorsinnaanissaat ilimananngimmat, partiinik mikinerusunik pinnguaqatissarsiortariaqassapput.

Demokraatit qineqqusaarnerminni Inuit Ataqatigiinnik suleqateqaqqissinnaanissartik aallaavigigaluarlugu, taamaattoq taasisartuminnut tamanna qulakkiivillugu oqaatigisinnaannginnerarpaat.

- Demokraatinit sulissutigerusupparput Naalakkersuisooqatigiinerup nanginneqaqqinnissaa. Tassami suliassarpassuit aallartisarnikuupput amerlasuulli naammassereernikuullutik. Taamaattorli suli suliassaqarpugut aqqullu suleqatigiinnerup pilersitaa atortariaqarlutigu isumaqarpugut. Kisianni qinersinerup kingorna uangut piumasaqaatitta allanit akuerineqarnissaat apeqqutaajumaarpoq kikkunnik suleqateqarnissatsinnut, Demokraatit siulittaasuat, Jens B. Fredriksen oqarpoq.

Taanna aamma oqarpoq Inuit Ataqatigiinnik suleqateqarnerminni, politikki ingerlanneqartoq eqqarsaatigalugu siunniussaminnik naammassisaqarsimallutik. Demokraatit anguniagaasa ilaat, tassalu sulinermi akileraarutit appartinneqarnissaannik anguniagaqarneq, Jens B. Fredriksenip angusimanerarpaa.

Taanna aperaarput Siumumik suleqateqarnissaminnut suut aporfiunersut.

- Assersuutigiinnarlugu Siumup piumasaraa suliniutinut angisuunut inatsisip allanngortinneqarnissaa taassuma saniatigut suliffeqarfissuit Nunatsinni aallartinniartut pinngortitaq eqqarsaatigalugu taakku qanoq akiliuteqassanersut Siumup allanngortikkusuppaa annertoorujussuarmik, tassalu tamakku isumaqataaffiginngilagut, Jens B. Fredriksen oqarpoq.

Demokraatit Inatsisartuni sisamanik ilaasortaatitaqarput. Isumasiunerilli kingulliit marluusut takutippaat ataatsimik ilanngarumaartut pingasuinnanngorlutik.

Atassutip Inatsisartuni ilaasortaatitaat marluusut allanngussanngitsut, qinersisartunik isumasiuinerit kingulliit takutippaat.

Qinigaaffimmi uani kingullermi Atassutip Siumut teknikkikkut suleqatigilerpaa aammali naalakkersuisoqatigiinnik suleqateqartareerlutik.

Partiit sorliit suleqatigissanerlugit, Atassutip siulittaasuata, Gerhardt Petersenip maanna oqaatigisinnaannginnerarpaa, taassuma takoqqaarusuppaa qinersinerup inerneriumaagassaa.

- Maannakkorpiaq oqaatigisinnaanngilarput kina Naalakkersuisut siulittaasuattut toqqassanerlutigu. Tamannami qinersinerup inernerata takutikkumaarpaa. Aperineqassaguttali kikkunnut suleqataarusunnitsinnik akissaagut politikikkut qanigisatta suleqatiginissaat piumanerullutigu, Atassutip siulittaasua, Gerhardt Petersen taama oqarpoq.

Taamaattorli Siumup suleqatiginissaa ilimanarnerusoq, Gerhardt Petersenip oqaatigaa Siumukkut anguniagaat soorlu pisuussutinut akileraarutit isumaqatigiissutigikanneramikkit taakku suleqatiginissaat ilamanernerusoq oqaatigalugu.

Atassut sinnerlugu kikkut Inatsisartunut qineqqusaartussat aqqi ataasinngorpat kikkunut tamanut nalunaarutigineqarumaartut, Gerhardt Petersenip oqaatigaa. Maannali Inatsisartuni Atassutip ilaasortaatitai marluusut, Siverth K. Heilmann aamma Knud Kristiansen qineqqusaaqqinnissaminnik kissaateqarsimasut Gerhardt Petersenip oqaatigaa.

Kattusseqatigiit Partiiat kikkunnik tamanik suleqateqarusuppoq, maannali Naalakkersuisoqatigiit ingerlaannarnissaat aallaavigineqartariaqartoq, siulittaasup Anthon Fredriksenip oqaatigaa.