Qinersinermut ilisimasalik: Demokraatiskiunngilaq

Folketingip ataatsimiittarfissuani, Christiansborgimi Nuntsinniit kikkut politikerit marluk ukiuni sisamani tulliuttuni isisiatitarissanerlutigit, kingusinnerpaamik novembarip aqqaneq-aappaanni ilisimalereertussaavarput.

- Qinersinissaq aatsaat nalunaarutigineqarpat kikkut qinigassanngortinnerivut nalunaarutigiumaarpagut, taama nalunaarput Inuit Ataqatigiit, Demokraatit, Atassut aamma Kattusseqatigiit Partiiat.

Taamaaliorneq demokraatiskiunngilaq isumaqaranilu, Aarhus Universitetimi professori qinersisarnerlu pillugu ilisimatooq, Jørgen Elklit isumaqarpoq.

-  Qineqqusaartitassanik isertuussineq qinersisartut allallu isaannik isigalugu demokraatiskiunngilaq, Jørgen Elklit KNR-imut taama ersaritsigisumik oqarpoq.

Nunatsinni qineqqusaartitassat qinersisartunit taamaallaat sapaatip akunnerini pingasuinnarni isummerfigineqarnissaminnik periarfissinneqarput  - tamannalu kikkunnulluunniit sullissilluannginneruvoq, Jørgen Elklit isumaqarpoq.

- Partiit qinigassanngortitassaminnik suli tusarliussaqannginnerat sunik pitsaasunik pissuteqarnersoq takujuminaappoq. Qinersisartut piffissaqarfigisariaqarpaat kina qinissanerlugu. Tamassuma saniatigut partiit nalunaajaarunik imminnut periarfississapput kikkunnut tamanut oqariartuumminnik anngussinissaminnut. Taamaalillutik partiit, qinersisartut qinigassanngortittullu sapaatip akunnerini pingasuni kingullerni imminnut ilisarisimanerullutik oqallissinnaassammata, Jørgen Elklit oqarpoq.

Kikkut qinigassanngortinneqarnissaannik isertuussinerujussuaq qanoq isumaqarnersoq paasiuminaatsorujussuusoq Jørgen Elklit isumaqarpoq, nangillunilu oqarluni imaassinnaasoq qinigassanngortittunik pissanganarsaarineq tunuliaqutigiinnarlugu taamaaliortoqartoq.

- Partiit qinigassanngortitaminnik suli nalunaarutiginninnginnerannut pissutsip aapparisinnaavaa, qinersineq ilimagineqartutut kingusinnerpaamik novembarimi pisussaammat, piffissap taassuma nallinnginneranni, immaqa augustimi septembarimiluunniit, qinigassanngortitaminnik allannguinissaminnik periarfissaqarniassagamik. Tamannalu ima paasineqarsinnaavoq, partiit siunertarigaat qinigassanngortitaminnik aqutsiniarneq. Taamaassappallu tamanna kukkutaarnerujussuussaaq, professori Jørgen Elklit taama oqarpoq.

Politologip Jakob Janussenip KNR-imut oqaatigaa, Danmarkip Nunatsinnut oqartussaaqataanerata annikinnerulersimanera Folketingimut qinersinissap immaqa soqutigineerutilerneranut pissutaasinnaalluartoq.